एम्बुलेन्स र ट्रक ठोकिँदा मृत्यु

रत्ननगर (चितवन), १९ माघ ।  रत्ननगरमा आज साँझ ट्रक र एम्बुलेन्स एकापसमा ठक्कर खाँदा एक जनाको मृत्यु तथा दुई जना गम्भीर घाइते भएका छन् ।

मृतक तथा घाइतेको पहिचान हुन सकेको छैन । गम्भीर घाइते दुईको भरतपुर अस्पतालमा उपचार भइरहेको चितवनका प्रहरी नायब उपरीक्षक राजन अधिकारीले जानकारी दिनुभयो ।

ना२च ५४५४ नंको रत्ननगर पोलिटेक्निकको एम्बुलेन्स र भरतपुरबाट पूर्वतर्फ जाँदै गरेको ना३ख ३१९९ नंको ट्रक ठोकिएका थिए । तीव्र गतिका कारण दुर्घटना भएको प्रहरीले अनुमान गरेको छ ।

एम्बुलेन्स चालकलाई च्यापिएको अवस्थामा उद्धार गरिएको र  ट्रक  चालकलाई नियन्त्रणमा लिइएको प्रहरीले जनाएको छ ।