‘अन्तरिम’ शब्द हटाएर संविधान जारी गर्न मधेसी दलले मानेनन्ः नेता देउवा

धनगढी, १७ माघ । नेपाली काँग्रेसका वरिष्ठ नेता शेरबहादुर देउवाले अन्तरिम संविधानको अन्तरिम शब्द हटाएर संविधान जारी गर्न आफुले राखेको प्रस्तावलाई मधेसी दलले नमानेको बताउनुभएको छ ।

आज गेटा विमानस्थलमा नेपाल प्रेस युनियनले गरेको पत्रकार सम्मेलनमा नेता देउवाले समयमै सहमतिमा संविधान जारी हुन नसकी दलहरुबीच मतभेद बढेको सन्दर्भमा निकासका लागि आफूले सो प्रस्ताव राखेको उल्लेख गर्नु भयो ।

पत्रकारको जिज्ञाशामा  उहाँले राज्यको पुनःसंरचना गर्दा सुदूरपश्चिमको तराईका दुई जिल्ला कैलाली र कञ्चनपुरलाई पहाडका जिल्लाबाट अलग गर्नु हुँदैन भन्नेमा अघिल्लो संविधानसभामा नै एमाओवादी, काँग्रेस र नेकपा एमालेले हस्ताक्षर गरिसकेकाले यी दुई जिल्लालाई टुक्र्याउने कुरा गर्नुको अर्थ नभएको बताउनुभयो ।