चापागाउँ (ललितपुर), ११ माघ । नेपाली काँग्रेसका उपसभापति रामचन्द्र पौडेलले देशको विकास र स्थायित्वका लागि संविधान निर्माण छिट्टै गरिनुपर्ने बताउनुभएको छ ।

काँग्रेस केन्द्रीय नीति तथा प्रशिक्षण विभागद्वारा आज काँग्रेस पार्टी कार्यालयमा ७५ वटै जिल्लाका कार्यालय सचिवलाई दिइएको क्षमता अभिवृद्वि प्रशिक्षण कार्यक्रमको दोस्रो सत्रमा उपसभापति पौडेलले उक्त कुरा बताउनु भएको हो ।

उहाँले संविधान निर्माण कार्यमा आएको अवरोधको सामना गर्न काँग्रेस सक्षम रहेको चर्चा गर्दै देशको गतिशीलताका लागि संविधान निर्माणको काम द्रूत गतिमा अगाडि बढ्नेमा विश्वास दिलाउनु भयो ।

पहिलो पटक काँग्रेसले कार्यालय सचिवहरुलाई दिन लागेको कार्यालय व्यवस्थापन र सञ्चालन सम्बन्धी प्रशिक्षणले पार्टीको जिल्ला तह सञ्चालन मजबुत हुने आफूले विश्वास लिएको उपसभापति एवम् प्रशिक्षण विभाग प्रमुख पौडेलले उल्लेख गर्नुभयो ।

सो अवसरमा पार्टी महामन्त्री एवम् उपप्रधानमन्त्री प्रकाशमान सिंहले प्रशिक्षणबाट सवै कार्यालय सचिवले आ–आफ्नो जिल्लामा प्रभावकारी रुपमा कार्य सम्पादन गर्न सक्ने धारणा राख्नु भयो ।

केन्द्रीय नीति तथा प्रशिक्षण विभागका कार्यकारी निर्देशक मधु आचार्य, रजनी थापा, उत्तर चापागाईं, सुधीर अर्याल लगायतले प्रशिक्षण दिनु भएको थियो ।