प्रधानमन्त्रीसँग बेल्जियमका पूर्व प्रधानमन्त्री येभ्स् लेतरमेको भेट

काठमाडौँ, १० माघ । प्रधानमन्त्री सुशील कोइरालासँग नेपाल भ्रमणमा रहनुभएका बेल्जियमका पूर्व प्रधानमन्त्री येभ्स् लेतरमेले आज बिहान प्रधानमन्त्री निवास बालुवाटारमा शिष्टाचार भेट गर्नुभएको छ ।

भेटमा नेपाल र बेल्जियम सम्बन्ध, नेपालको आर्थिक र सामाजिक विकासमा बेल्जियमले गर्दै आएको सहयोग, सङ्घीय शासनमा बेल्जियमको अनुभव, नेपालको लोकतान्त्रिक यात्रा तथा नेपालको संविधान निर्माणको प्रक्रियाका बारेमा कुराकानी भएको थियो ।

वार्ताका क्रममा प्रधानमन्त्री कोइरालाले नेपालले ऐतिहासिक र युगान्तकारी परिवर्तनमार्फत हासिल गरेका सङ्घीयता, गणतन्त्र, समावेशीतासहितको लोकतन्त्रजस्ता उपलब्धिहरु अत्यन्त महत्वपूर्ण भएका बताउनुभयो । उहाँले यसलाई संस्थागत गर्ने प्रक्रियामा केही असहज परिस्थिति उत्पन्न भए पनि छिट्टै नै यी उपलब्धिहरुलाई संस्थागत हुने गरी संविधान जारी हुने विश्वास व्यक्त गर्नुभयो ।

वार्तामा पूर्व प्रधानमन्त्री येभ्स्ले संविधान जारी भएपछि पनि सङ्घीयताका धेरै विषयहरुको व्यवस्थापन गर्न सबै राजनीतिक शक्तिहरुले संयमतापूर्वक काम गर्न आवश्यक हुने आफ्नो मुलुकको अनुभव सुनाउनुभएको थियो ।