काठमाडौँ, ५ माघ । अर्थ मन्त्री डा. रामशरण महत र नेपाल भ्रमणमा रहनु भएका विश्व बैंक अन्तर्गत दक्षिण एसिया हेर्ने उपाध्यक्ष एनेट डिक्सनबीच अर्थ मन्त्रालयमा आज भेटवार्ता भएको छ ।

सो अवसरमा अर्थमन्त्री डा। महतले समग्र आर्थिक अवस्था सन्तोषजनकरुपमा अगाडि बढिरहेको जानकारी गराउनुभएको अर्थ मन्त्रालयले जनाएको छ ।

नेपालको आवश्यकता, योजना र प्राथमिकताअनुसार सहयोग गर्ने बैंकको चारवर्षे रणनीतिका बारेमा सन्तुष्टि व्यक्त गर्दै उहाँले आगामी दिनमा बैंकलाई ऊर्जा तथा पूर्वाधार क्षेत्रमा सहयोगको आवश्यकता रहेको बताउनुभयो ।

नेपालले सन् २०२२ सम्ममा विकासशील मुलुकको दाँजोमा पुग्ने सङ्कल्प गरेको उल्लेख गर्दै अर्थमन्त्री डा। महतले त्यसका लागि पूर्वाधारका क्षेत्रमा ठूलो लगानी आवश्यक भएको उल्लेख गर्नुभयो ।

उहाँले भन्नुभयो, “नेपालले सामाजिक क्षेत्र र आर्थिक संवेदनशीलताका क्षेत्रमा उल्लेख्य प्रगति हासिल गरेपनि प्रतिव्यक्ति आम्दानीका दृष्टिले अझै धेरै काम गर्नुपर्ने आवश्यकता छ ।”

विश्व बैंक समूहले नेपालको ऊर्जा क्षेत्रमा लगानी गर्ने चासो र गम्भीरता देखाएकोमा खुसी व्यक्त गर्दै अर्थमन्त्री डा। महतले हालै भारतसँग भएको विद्युत् व्यापार सम्झौता र सार्क सम्मेलनताका भएको प्रसारणलाइन जोड्ने सम्झौताले नेपालमा लगानी गरी उत्पादन हुने बिजुलीको दक्षिण एसियाको बजार सुरक्षित भएको उल्लेख गर्नुभयो ।

सो अवसरमा बैंकका दक्षिण एसिया उपाध्यक्ष डिक्सनले ऋण भुक्तानी सम्बन्धी क्षमता बढेको कारणले अनुदान घटेको स्पष्ट पार्नुभएको थियो । उहाँले भन्नुभयो “नेपालले विश्व बैंकबाट प्राप्त गर्ने सहुलियतपूर्ण ऋणको आकार बढ्ने भएकाले समग्रमा बढी रकम पाउने र ऋण लिएको मिति तथा भुक्तानी मितिबीचको मूल्यमा अझ बढी लाभ पुग्नेछ ।”