आठसय सिलिन्डर आठ हजार ग्राहक

फलेवास (पर्वत), ५ माघ । विगत ३ महिनादेखि ग्यासको हाहाकार भएको पर्वतमा आज ८०० सिलिन्डर ग्यास भित्रिएको छ । पर्वत उद्योग वाणिज्य सङ्घ र जिल्ला प्रहरी कार्यालय पर्वतको पहलमा बजारमा ग्यास भित्रिएपछि उपभोक्ताको भीड लागेको थियो ।

आठसय ग्यास लिन आठ हजारभन्दा बढी उपभोक्ताको भीड भएपछि प्रहरीले वितरणको व्यवस्था मिलाएको थियो । ग्यास ल्याउनका लागि पोखराबाट प्रहरीले स्कर्टिङ समेत गरेको थियो ।

पोखरास्थित शक्ति ग्यास उद्योगबाट ८०० सिलिन्डर ल्याएर वितरण गरिएको र यसबाट केही राहत मिल्ने पर्वत उद्योग वाणिज्य सङ्घका प्रथम उपाध्यक्ष हरिओम शर्मा लामिछानेले बताउनुभयो ।

बजारमा ग्यास भित्रिए पनि डिलरहरुले लुकाएर कृत्रिम अभाव सिर्जना गर्ने भएकाले सडकमै वितरण व्यवस्था मिलाइएको उहाँले बताउनुभयो ।

पर्वतमा दैनिक आठ हजार भन्दा बढी सिलिन्डर ग्यासको माग हुने भए पनि ८०० सिलिन्डरले केही नहुने भए पनि यसले थोरैमात्र राहत मिल्ने बताइएको छ ।

पर्वत सदरमुकामका साथै जिल्लाका ग्रामीण भेगमा समेत ग्यासको उपभोग गर्ने उपभोक्ता बढेकाले ग्यासको माग दैनिक रुपमा बढ्ने गरेको पर्वत उद्योग वाणिज्य सङ्घले जनाएको छ ।