इलाम, ५ माघ । देशमा शान्ति र संविधान आओस् भन्ने उद्देश्य लिएर चितवन मेघौली–५ का एक युवा साइकल यात्रामा निस्किएका छन् ।

यही माघ ८ मै संविधान जारी भएर शान्ति, अमनचयन भएको हेर्ने अभीष्ट लिएर मेघौलीका ४१ वर्षीय चन्द्रबहादुर क्षेत्री साइकल यात्रामा निस्कनुभएको हो ।

एकचक्के साइकल लिएर भ्रमणमा निस्किनुभएका उहाँले अहिले १७ जिल्ला घुमिसक्नुभएको छ । “साइकल यात्राको माध्यमबाट देशमा शान्ति र संविधान आओस् भन्ने मेरो कामना हो”–क्षेत्रीले भन्नुभयो–“यसबाटै नेपालको यात्रा गर्नुछ ।”

विसं २०५६ देखि साइकल यात्रा प्रारम्भ गर्नुभएका क्षेत्रीले पोखरा, नुवाकोट, धादिङ, धरान, चितवनलगायत जिल्ला घुमिसक्नुभएको छ । एकचक्के साइकलमा चढेर जिल्ला भ्रमण गर्नु चानचुन कुरा होइन । “पूरै शरीरलाई सन्तुलनमा राखेर साइकल चलाउनुपर्छ”–क्षेत्री भन्नुहुन्छ–“यो अरू साइकल यात्रीका लागि कठिन हो ।” यात्रा गर्दा धेरै ठाउँमा लडेर शरीर दुखेको सम्झँदै अब दुई÷तीन दिनमा ताप्लेजुङको पाथीभरा मन्दिरको यात्रा गर्ने उहाँले बताउनुभयो ।

एकचक्के साइकल यात्रा गर्ने पहिलो नेपाली आफू भएको उहाँ दाबी गर्नुहुन्छ । उहाँ दैनिक २०÷२५ किलोमिटर यात्रा गर्नुहुन्छ ।

इलामको श्रीअन्तु, कन्याम र सदरमुकाम पनि उक्त साइकलबाटै यात्रा पूरा गर्नुभएको छ । आइतबार क्षेत्रीले चोकबजारमा करिब २० मिनेटसम्म प्रदर्शन गर्नुभयो ।