पाँचथरमा अनुमतिपत्र प्राप्त विज्ञान शिक्षक अभाव, राज्य वा जिशिकाले सोच्नु पर्ने

पाँचथर, ३ माघ । विज्ञान विषय शिक्षण गर्ने शिक्षकसँग अनुमतिपत्र नहुँदा जिल्लाका सामुदायिक विद्यालयमा अध्ययनरत विद्यार्थीको पठनपाठनमा समस्या भएको छ ।

फिदिम स्रोत केन्द्रका स्रोत व्यक्ति विनोदकुमार ठाकुरले भन्नुभयो, “विज्ञान विषय नै लिएर अध्ययन गरेका शिक्षकहरुसित अनुमतिपत्र नभएका कारणले सो विषय शिक्षण गर्ने शिक्षकको समस्या देखिएको हो, अब अनुमतिपत्र नभएका शिक्षकलाई नियुक्ति गर्ने प्रावधान नभएकाले पनि यो समस्या निम्तिएको हो ।”

जिल्लाका सामुदायिक विद्यालयका माध्यमिक तथा निम्न माध्यमिक तह गरी झन्डै दुई दर्जनभन्दा बढी विज्ञान विषय शिक्षकको कोटा रिक्त रहेको जिल्ला शिक्षा कार्यालय पाँचथरले जनाएको छ ।

जिल्ला शिक्षा अधिकारी ज्ञानमणि नेपालले भन्नुभयो, “यसलाई अब शिक्षक सेवा आयोग तथा शिक्षा मन्त्रालयले नै एक किसिमको निर्णय गर्नुपर्ने देखिन्छ, कि त अस्थायी अनुमतिपत्रको व्यवस्था गरेर ती शिक्षकको पदपूर्ति गर्ने वातावरण सिर्जना गर्नुपर्ने देखिन्छ, यसले विद्यार्थीको पठनपाठनमा नराम्ररी प्रभाव पारेको छ ।”

नेपाल शिक्षक युनियन पाँचथरका अध्यक्ष रुपनारायण जवेगुले भन्नुभयो, “शैक्षिकसत्र २०७१ बाट नै विज्ञान विषय शिक्षण गर्ने शिक्षकको अभावमा नौ महिना समस्या बित्न लाग्यो, अब यसबारेमा कि त राज्य कि त जिल्ला शिक्षा कार्यालय पाँचथरले नै विकल्प लिएर अघि बढ्नुपर्दछ, नत्र लाखौं विद्यार्थीको भविष्य बर्बाद पार्न मिल्दैन ।”