भद्रपुर, ३ माघ । असहाय वृद्धवृद्धाका लागि झापाको बिर्तामोड नगरपालिका–९ स्थित विराट पोखरको दक्षिणतर्फ सुविधासम्पन्न भरत विश्रान्ति आश्रम निर्माण हुने भएको छ ।

वृद्धाश्रमका लागि नेपाली काँग्रेसका स्व नेता सिके प्रसाईंकी श्रीमती गिरिराजले आठ लाख रुपैयाँ प्रतिकठ्ठा मूल्य पर्ने एक बिघा १७ कठ्ठा निःशुल्क उपलब्ध गराएको आश्रमका सदस्य लयप्रसाद सङ्ग्रौलाले जानकारी दिनुभयो ।

आश्रम निर्माणका लागि समाजसेवी हर्कलाल गिरीको संयोजकमा बनेको समितिले १०० जनालाई आजीवन सदस्य पनि बनाइसकेको तिनले जनही रु एक लाख प्रदान गरेको बताइएको छ । करिब ८० देखि १०० वृद्धवृद्धा रहने सो आश्रममा बगैंचा, स्वास्थ्य चौकीलगायत पनि रहने छन् ।