प्रवासी भई जो पराई देशमा बस्छ
प्रवासको दुख उसले मात्र बुझ्न सक्छ
इराकी युद्धभूमिमा होस् या
कतारको जर्जर मरुभूमिमा
जापानको हरियाली शहरमा होस्
या अमेरिकी स्वतन्त्र भूमिमा

नौलाखे तारा गीतमा नै किन नहोस
प्रवाशी बनि प्रवासको पिडा
प्रवासी नेपाली ले नै बुझ्न सक्छ
मुगलाने भै मुग्लाने व्यथा
बहादुर गोरखा बन्ने मात्र भेउ पाउन सक्छ
मुम्बईको गल्लिमा बरालिने मात्र बुझ्न सक्छ

प्रवासी नेपालीको मौलिकपन जोगाउन
गीतमामा नेपालीको व्यथा पोखीदिन्छ
मौलिक अधिकार खोज्दै हराउदा
साहित्यमा आफ्नो अस्तित्व बाँड्न थाल्छ

आफ्नी मौलिक संस्कार ,संस्कृति बचाउन
देउसी ,मारुनी ,भैली र लैबरीको राग अलापिन्छ

मन्दिर ,मस्जिद ,गुम्बा जहाँ गए पनि
आफ्नो देशको नक्सा मनमा लिएर हिड्छ
नेपाली भई नेपालीको मौलिकता राख्न
जमरा ,सयपत्री ,दुबो र मखमलीले
घर आँगन दियोले सजाई दिन्छ
नबिर्स हामी नेपाली हौ भन्ने भाव जगाईदिन्छ

लालिगुरास ,लालुपाते भाका राखी
चन्द्र र सूर्यअंकित झन्डा निशानले
जहाँ रहे पनि आफ्ना सन्ततिलाई
गोरखालीको बिर गाथा कहिदिन्छ
प्रवासी है त् के भयो ,नेपाली हौ हामी
नेपालीत्व भित्रै हामी छौ l

प्रवासी हुनु को पिडा -कविता संग्रह प्रवासका सुस्केराहरु बाट लिइएको