इजरायली प्रधानमन्त्री बेन्जामिन नेतन्याहू राष्ट्रपति डोनाल्ड ट्रम्पसँग भेटघाट गर्न सोमबारको रात्रिभोजका लागि इजरायलबाट वाशिंगटन प्रस्थान गरेका छन्। नेतन्याहू आइतबार अबेर वाशिंगटनतर्फ उडेका हुन्।

नेतन्याहूको कार्यालय अनुसार भेटवार्तामा इजरायल-ईरान द्वन्द्व, तेहरानको आणविक कार्यक्रमको भविष्य र हमाससँग सम्भावित युद्धविराम जस्ता महत्वपूर्ण विषयहरूमा छलफल हुनेछ।

नेतन्याहूले आफ्नो वक्तव्यमा भनेका छन्, “हामीलाई अमेरिकाको यति शक्तिशाली समर्थन अहिलेसम्म कहिल्यै प्राप्त भएको थिएन। राष्ट्रपति ट्रम्पको साथ र पछिल्लो महिनाको ईरानमाथिको हवाई आक्रमणमा अमेरिकाको सहभागीता अत्यन्तै निर्णायक रह्यो।”

“हामीले साझा शत्रु ईरानविरुद्ध ठूलो जीत हात पारेका छौं,”नेतन्याहूले उत्साहपूर्वक भने।

यो नेतन्याहूको ट्रम्प राष्ट्रपति बनेपछि तेस्रो अमेरिकी भ्रमण हो। भ्रमणको क्रममा नेतन्याहूले कांग्रेस सदस्य र ट्रम्प प्रशासनका अधिकारीहरूसँग पनि भेटवार्ता गर्ने कार्यक्रम रहेको जनाइएको छ।

यो भेट इजरायल-अमेरिका सम्बन्धमा थप गहिरो रणनीतिक सहकार्यको संकेत हो।