अमेरिकी राष्ट्रपति डोनाल्ड ट्रम्पको पछिल्लो आर्थिक प्रतिवेदनले सबैलाई चकित पारेको छ। 

सरकारी कागजातअनुसार, गत वर्ष मात्रै ट्रम्पले आफ्नो क्रिप्टो (अॅकिय/डिजिटल मुद्रा) व्यवसायबाट लगभग १.२ बिलियन डलर आम्दानी गरेका छन्।

राष्ट्रपति बनेपछि सुरु गरिएका यी नयाँ व्यवसायहरूले उनका दशकौँ पुराना घरजग्गा र व्यापारहरूलाई समेत पछि पारेका छन्। यो आम्दानीको मुख्य स्रोत ‘वर्ल्ड लिबर्टी फाइनान्स’ र आफ्नै अनुहार छापिएका ‘मेम’ सिक्काहरू हुन्। 

प्रतिवेदनअनुसार, वर्ल्ड लिबर्टी फाइनान्सबाट मात्रै उनले ५० करोड डलरभन्दा बढी कमाएका छन् भने विभिन्न सिक्का बिक्रीबाट थप ६० करोड डलरभन्दा बढी हात पारेका छन्।

तर, यो कमाइको पाटो निकै विवादास्पद देखिएको छ। धेरै साना लगानीकर्ताहरूले यी क्रिप्टो उत्पादनहरूमा पैसा हालेर ठूलो नोक्सानी बेहोरिरहेका बेला राष्ट्रपति ट्रम्पले भने नाफा सुरक्षित गरेका छन्। 

विज्ञहरूका अनुसार, ट्रम्पले क्रिप्टो उद्योगमाथि सरकारले गर्ने कडा नियमनलाई रोक्न भूमिका खेलेका थिए, जसले उनको व्यापारको मूल्य ह्वात्तै बढायो।

यति मात्र होइन, उनले ट्रम्पको नाम अंकित बाइबल, जुत्ता र घडी जस्ता वस्तुहरू बेचेर पनि लाखौँ डलर कमाएका छन्। 

एकातर्फ उनको घरजग्गाको व्यापार विदेशमा समेत तीव्र गतिमा विस्तार भइरहेको छ, अर्कोतर्फ क्रिप्टोबाट भएको यो अकल्पनीय आम्दानीले पदमा रहेर व्यक्तिगत लाभ लिने प्रवृत्तिमाथि गम्भीर प्रश्न उठाएको छ। 

एपिका अनुसार ती देशहरू, जहाँ ट्रम्पको व्यापार फैलिरहेको छ, तिनै देशहरूसँग अहिले अमेरिकाको व्यापार र सैन्य मामिलामा महत्त्वपूर्ण वार्ताहरू चलिरहेका छन्।