अमेरिकाको जर्जिया राज्यमा मतदाताको गोप्य सूची सार्वजनिक गर्ने कि नगर्ने भन्ने विषयमा एउटा निकै महत्त्वपूर्ण कानुनी लडाइँ चलिरहेको छ। अमेरिकी न्याय विभागले जर्जिया राज्यका सचिव ब्राड राफेन्सपर्जर विरुद्ध मुद्दा दायर गर्दै राज्यभरिको मतदाता नामावली माग गरेको थियो।

यही ठूलो र संवेदनशील मुद्दाको सुनुवाइ अमेरिकी संघीय न्यायाधीश एलेनोर रोसले गरिरहेकी थिइन्। तर, हालै उनले आफू यस मुद्दाबाट बाहिरिएको घोषणा गरेकी छन्।

एपीका अनुसार न्यायाधीश रोस आफैं पछि हट्नुको पछाडि उनको पुरानो विवाद र राजनीतिक संलग्नता जोडिएको छ। यसअघि भएको एउटा आन्तरिक अदालती अनुसन्धानले उनलाई दोषी देखाएको थियो। अनुसन्धानका अनुसार उनले अदालतभित्रै आफ्नो कार्यकक्षमा एक उच्च पदस्थ प्रहरी अधिकारीसँग अनैतिक सम्बन्ध राखेकी थिइन्, एउटा राजनीतिक दलको कार्यक्रममा भाग लिएकी थिइन् । र, पछि यसबारे सोधपुछ गर्दा सुरुमा झुटो बोलेकी थिइन्। यसका लागि उनलाई गोप्य रूपमा कडा चेतावनी समेत दिइएको थियो।

अहिले आएर अमेरिकी न्याय विभागले उनको निष्पक्षतामाथि फेरि प्रश्न उठाएको छ। न्याय विभागका अनुसार रोस फल्टन काउन्टीकी जिल्ला सरकारी वकिल फानी विलिसको चुनावी अभियानको एउटा कार्यक्रममा सहभागी भएकी थिइन्। वकिल विलिस तिनै व्यक्ति हुन् जसले राष्ट्रपति डोनाल्ड ट्रम्प र अन्य १८ जना विरुद्ध जर्जियाको सन् २०२० को चुनाव उल्ट्याउन खोजेको आरोपमा मुद्दा चलाएकी थिइन्।

न्यायाधीश रोस र वकिल विलिसले विगतमा एउटै कार्यालयमा सँगै काम गरेका थिए र उनीहरू पुराना साथी हुन्। अमेरिकी राजनीतिमा ट्रम्प र विलिसबीचको यो लडाइँ निकै चर्को र विवादित बनेको छ। यस्तो अवस्थामा रोसले हेरिरहेको चुनावी मुद्दामा उनको व्यक्तिगत सम्बन्धले गर्दा पक्षपात हुन सक्ने आशंका न्याय विभागले गरेको थियो।

यदि कुनै न्यायाधीशको निर्णयमा शङ्का गर्ने ठाउँ भयो भने अदालतको साख गिर्छ। त्यसैले, आफूले सही काम गरे पनि सर्वसाधारण वा कानुनले आफ्नो निर्णयलाई शङ्काको नजरले नहेरून् भनी सजगता अपनाउँदै न्यायाधीश रोसले मङ्गलबार यस मुद्दाबाट अलग हुने आदेश जारी गरेकी हुन्।