इरानी सरकारी सञ्चारमाध्यमले इजरायली हमलामा अर्का एक शीर्ष आणविक वैज्ञानिक मारिएको पुष्टि गरेको छ। प्रेस टिभीका अनुसार इरानको आणविक हतियार कार्यक्रममा कार्यरत मोहम्मद रजा सेद्दिघी साबेरलाई राजधानी तेहरानको उत्तरी क्षेत्रमा भएका पछिल्ला इजरायली हमलामा “हत्या” गरिएको हो।

इजरायलले विगत १२ दिनदेखि इरानको आणविक हतियार कार्यक्रम, शीर्ष सैन्य अधिकारीहरू र क्षेप्यास्त्र अड्डाहरूलाई लक्षित गर्दै व्यापक आक्रमणहरू गरिरहेको छ। यस क्रममा धेरै उच्च पदस्थ इरानी आणविक वैज्ञानिकहरू मारिएको दाबी इजरायलको छ।

“वैदेशिक सम्बन्ध परिषद (काउन्सिल अन फरेन रिलेसन्स)को सोमबारको सूचना अनुसार, हालसम्म कम्तीमा १० इरानी वैज्ञानिकहरू यी हमलामा मारिएका छन्। यसमा इरानको आणविक ऊर्जा संगठनका पूर्व प्रमुख फेरेडून अब्बासी र संगठनका पूर्व उपप्रमुख अमीर हुसेन फेक्ही पनि सामेल छन्।

सिएनएनले दिएको जानकारी अनुसार सेद्दिघी साबेरलाई यसै वर्षको सुरुमा अमेरिकी विदेश विभाग र वित्तीय विभागले इरानको आणविक कार्यक्रमसँगको सम्बन्धका कारण प्रतिबन्ध लगाएको थियो। अमेरिकी विदेश विभागका अनुसार, उनी इरानको रक्षा, आविष्कार र अनुसन्धान संगठनमा विस्फोटक-सम्बन्धित परियोजनाहरूमा काम गर्ने समूहका प्रमुख थिए। विभागले उक्त समूहका परियोजनाहरूमा आणविक विस्फोटक उपकरणहरूको विकासका लागि लागू हुने अनुसन्धान र परीक्षण समावेश रहेको जनाएको छ।

इजरायली प्रधानमन्त्री बेन्जामिन नेतन्याहूको कार्यालयले मंगलबार इजरायल रक्षा बलले अर्का एक इरानी आणविक वैज्ञानिकलाई मारेको पुष्टि गरेको छ, यद्यपि सेद्दिघी साबेरको नाम उल्लेख गरिएको छैन।