भियतनाममा समुन्द्री आँधीका कारण मृत्यु हुनेको संख्या ८७ पुगेको छ भने ७० जना बेपत्ता भएका छन् ।

सरकारी सञ्चारमाध्यमका अनुसार यागी आँधी र त्यसपछिको वर्षाबाट आएको बाढी र पहिरोका कारण मृत्यु हुनेको संख्या ८७ पुगेको छ भने अन्य ७० जना बेपत्ता र सयौं घाइते भएका छन् ।

दक्षिणपूर्वी एसियाली देशमा दशकौंमा आएको सबैभन्दा शक्तिशाली आँधी यागी हो । गत शनिबार १४९ किलोमिटर प्रतिघण्टा (९२ माइल प्रतिघण्टा) को गतिमा आएको हावा जमीनमा आए पछि गत आइतबार कमजोर भए पनि वर्षा जारी भएको एबिसीन्यूजले जनाएको छ ।

राजधानी हनोईबाट बग्ने रक्त नदी (रेड रिभर )सहित धेरै नदीहरूमा पानीको स्तर खतरनाक रूपमा उच्च रहेको थियो । अधिकारीहरूलाई नजिकै बस्ने मानिसहरूलाई खाली गर्न बाध्य तुल्याएको बताए ।

चीनसँग सीमा जोडिएको उत्तरपश्चिमी लाओ काइ प्रान्तमा भारी वर्षा र पहिरोमा परी १९ जनाको मृत्यु भएको छ । प्रान्तको रातो नदीको पुल भत्किएपछि तीन जनाको उद्धार गरिएको छ भने अन्य १३ जना बेपत्ता छन्।