टेक्सस राज्यको डालसमा नेपाली समुदायको पहिलो फर्निचर स्टोरको रूपमा आफ्नो पहिचान बनाएको “नमस्ते फर्निचर” ले अब पेन्सलभेनिया राज्यको राजधानी हेरिसबर्गमा आफ्नो नयाँ आउटलेट विस्तार गरेको छ। यो विस्तारले नेपाली समुदायमा थप गौरव र उत्साह थपेको छ, किनकि यो स्टोरले नेपाली आप्रवासी व्यवसायको बढ्दो उपस्थिति र योगदानलाई थप बलियो बनाएको छ।

Union Square Plazza, हेरिसबर्गमा स्थापना गरिएको यो नयाँ आउटलेटको उद्घाटन कार्यक्रम यसै साता एक भव्य समारोहका बीच सम्पन्न भएको हो। यस अवसरमा विधिपूर्वक पूजा आराधना गरी, स्टोरको शुभारम्भ गरिएको थियो। कार्यक्रममा उपस्थित रहेका विशिष्ट व्यक्तिहरूले रिबन काटेर स्टोरको औपचारिक उद्घाटन गरे। यस समारोहमा नेपाली र अमेरिकी समुदायका विभिन्न क्षेत्रका व्यक्तिहरूको उपस्थिति रहेको थियो, जसले यो स्टोरलाई सामुदायिक भावना र आपसी सहयोगको प्रतीक बनाएको थियो।

कार्यक्रमको प्रमुख आकर्षणमा नेपाली चलचित्र उद्योगकी एक समयकी चर्चित नायिका सारंगा श्रेष्ठको उपस्थिति थियो, जसले नेपाली कला र संस्कृतिलाई अन्तर्राष्ट्रिय स्तरमा चिनाउन महत्वपूर्ण योगदान पुर्याएकी छिन्। साथै, अमेरिकामा स्थायी रूपमा बसोबास गरिरहेका चर्चित नायक मुकेश ढकालले पनि कार्यक्रममा आफ्नो उपस्थिति जनाएका थिए। उनीहरूको साथमा सुस्केहन्ना टाउनसिपका कमिसनर फ्रेड फेलोना र भुटानिज कम्युनिटी अफ हेरिसबर्गका अध्यक्ष तिलक निउलाले पनि स्टोरको शुभारम्भमा रिबन काटेर सहभागिता जनाएका थिए। उपस्थित अतिथिहरुले यो स्टोर नेपाली समुदायको प्रगति र सफलताको उदाहरण भएको भन्दै आफ्नो शुभकामना व्यक्त गरेका थिए।

“नमस्ते फर्निचर हेरिसबर्ग” को यो नयाँ आउटलेट नेपाली र अन्य समुदायका ग्राहकहरूको आवश्यकतालाई ध्यानमा राखेर उच्च गुणस्तरीय फर्निचर उपलब्ध गराउने उद्देश्यले खोलिएको हो। स्टोरको लगानी र व्यवस्थापनमा हेरिसबर्गका स्थानीय व्यवसायी भवानी महत, टेक्ससका सञ्चारकर्मी तथा चलचित्र निर्देशक सुरेश दर्पण पोखरेल, र व्यवसायी बल्लभ पौडेल र रोशन घिमिरेको संयुक्त सहभागिता रहेको छ। उनीहरूको साझेदारीमा खोलिएको यो स्टोरले समुदायमा व्यवसायिक सहकार्य र लगानीको सशक्त उदाहरण प्रस्तुत गरेको छ।

यो अवसरमा स्टोर व्यवस्थापनले उच्च गुणस्तरीय फर्निचरलाई सुपथ मूल्यमा उपलब्ध गराउँदै नेपाली समुदायलाई सेवा दिने प्रतिबद्धता जनायो। उनीहरूले निकट भविष्यमा ओहायो राज्यमा अर्को शाखा खोल्ने योजना रहेको जानकारी पनि गराए। यसले अमेरिकाभरका नेपाली समुदायलाई गुणस्तरीय सेवा प्रदान गर्दै, फर्निचर उद्योगमा नेपाली व्यवसायको बलियो उपस्थिति जनाउने लक्ष्य राखेको छ।

समारोहमा उपस्थित सबैले यो प्रयासलाई नेपाली आप्रवासी व्यवसायको सशक्तिकरणको रूपमा लिएका थिए, र “नमस्ते फर्निचर” को यो नयाँ विस्तारले अमेरिकाको व्यवसायिक क्षेत्रमा नेपाली समुदायको पहिचानलाई अझ उचाइमा पुर्याउने विश्वास व्यक्त गरेका थिए।