केप कड नेपाली समाजको साधारण सभा र तेस्रो अधिवेशन अप्रिल १३, २०२४, शनिवारका दिन, कोर्टयार्ड वाई मेरियट होटल, केप कड, मासाच्युसेट्स अमेरिकामा सम्पन्न भयो। समाजका अध्यक्ष केवी राईको सभापतित्वमा शुरु भएको साधारण सभाको सञ्चालन सचिव ईच्छा खड्काले गर्नु भएको थियो भने उपस्थित सबैलाई सदस्य कृष्ण तिमल्सिनाले स्वागत गर्नु भएको थियो। सभाको उद्घाटन साना वालिकाहरूले बत्ति वालेर गरेका थिए ।

सचिव ईच्छा खड्काले पेश गर्नु भएको संस्थाको प्रगति विवरण र भए गरेका गति-बिधीहरूको प्रतिवेदन तथा कोषाध्यक्ष विमल खड्काले पेश गर्नु भएको आर्थिक प्रतिवेदन सभाले सर्वसम्मत रुपमा पारित गरेको थियो।

सभामा, समाजका सल्लाहाकार तथा विधान समितिका अध्यक्ष विष्णु मान प्रधानले प्रस्तावका लागी पेस गर्नु भएको संस्थाको विधान, उपस्थित सदस्यहरू बाट सर्वसम्मत रूपमा ताली बजाएर पारित गरिएको थियो । प्रधानले विधान माथी उठेका केही प्रश्न तथा जिग्यासाहरूका जवाफ दिएर प्रष्ट पार्नु भएको थियो।

उहाँले हामी मानव जाती सामाजिक प्राणी हो, हामी जता गएपनी हामी लाई हाम्रो समाज चाहिन्छ भन्दै, समाजका सवै सदस्यहरू मिलेर बिधानले दिएको अधिकार प्रयोग गरेर संस्था लाई अझ राम्रो संग अगाडी बढाउनु पर्ने कुरामा जोड दिदैं कार्यक्रम सफलताको शुभकामना सहित सबै लाई नेपाली नयॉं बर्षको २०८१ को शुभकामना बयक्त गरेका थिए ।

बन्द सत्रमा, केप कड नेपाली समाजको नयाँ कार्य समितिको निर्वाचन प्रयोजनका लागी गठित निर्वाचन समितका अध्यक्ष हरी राई, सदस्य प्रदिप बज्राचार्य र सदस्य मनोज क्षत्रीले संस्थाको विधान बमोजिम विधिपूर्वक प्रकृया पुरा गरी अधिवेशन वाट नयाँ कार्य समितीको निर्विरोध निर्वाचित भएको घोषणा गर्नु भएको थियो।

नयॉं कार्यसमितिको अध्यक्षमा केवी राई, बरिष्ठ उपाध्यक्षमा विष्णु मान प्रधान, उपाध्यक्षहरुमा कुवेर विन्दुकार र कृष्ण तिमल्सिना, महासचिवमा इच्छा खड्का, सचिवमा सरस्वती खनाल, सह- सचिवमा हर्कुलस कान्दंगवा, कोषाध्यक्षमा विमल खड्का, सह-कोषाध्याक्षमा सुशिला सिंह, महिला संयोजकमा प्रमिला धमला बन्जारा र युवा संयोजक कुमार तामाङ निर्विरोध निर्वाचित भएका छन् भने कार्यसमितिको सदस्यहरुमा, अजय खतिवडा, ध्रुव थापा, ज्योति केसी, खगेन्द्र राई, कुमुदा पोख्रेल, पार्वती चालिसे, समीर ओझा, सिताराम राई र टिका तामाङ निर्विरोध निर्वाचित भएका छन् । विधान अनुसार २१ जना रहने कार्यसमितिमा २० जना निर्वाचित भएका छन् । नव निर्वाचित कार्य समितिले बाँकी १ सदस्य पछि वोर्ड मिटिंग को निर्णय वाट मनोनित गर्ने छ।

संस्थापक अध्यक्ष तथा निर्वाचन समितिका अध्यक्ष हरी राई, सदस्य प्रदिप बज्राचार्य र सदस्य मनोज क्षत्रीले नयाँ कार्य समितिका पदाधिकारी तथा सदस्यहरुलाई खादा लगाई, प्रमाण पत्र प्रदान गरी पद तथा गोपनियताको सपथ गराउनु भएको थियो भने निर्वाचन समितिका अध्यक्ष राईले निर्वाचित कार्यसमिति सम्पूर्ण पदाधिकारी तथा सदस्यहरू लाई बधाई तथा शुभकामना ब्यक्त गर्नु भएको थियो।

साधारण सभामा केही सदस्यहरू मध्यवाट ठग बहादुर तिमल्सिना र हेम चालिसेले नव निर्वाचित कार्यसमितिलाई बधाई तथा शुभकामना व्यक्त गर्नु भएको थियो। सभामा उपस्थित सबैले एक आपसमा नयॉं बर्षको शुभकामना पनि आदान प्रदान गरेका थिए।

सभाले आयोजना गरेको रात्रि भोजमा बिभिन्न परिकार बनाएर ल्याउनु हुने सम्पूर्ण सदस्य तथा स्वयंसेवीहरू लाई सम्मान गरेर प्रमाण पत्र पनि प्रदान गरिएको थियो। उक्त सभामा ४६ जनाले आजिवन सदस्यता पनि लिएका थिए ।

अन्तमा, नव निर्वाचित अध्यक्ष केवी राईले सभामा उपस्थित सबै सदस्यहरूलाई उहॉंहरूको सहयोग, समर्थन र गरिमामय उपस्थितिको लागि हार्दिक धन्यवाद ज्ञापन गरेका थिए, उहॉंले विधान समिति, निर्वाचन समिति, सल्लाहकारहरु, कार्यसमीतिका पदाधिकारी तथा सदस्यहरू, स्वयंसेवकहरू र प्रत्यक्ष-अप्रत्यक्ष रुपमा साधारण सभा तथा अधिवेशन सफल बनाउन सहयोग गर्नुहुने सम्पूर्ण महानुभावहरू लाई विशेष धन्यवाद दिनुभएको थियो। अध्यक्ष राईले नब निर्वाचित कार्यसमितिका पदाधिकारी तथा सदस्यहरूलाई बधाई तथा सफल कार्यकालको लागी शुभकामना ब्यक्त गर्दै केप कड बासी हामी सबै नेपाली मिली हातेमालो गरेर संस्थालाई अगाडी बढाउदै जाने कुरामा जोड दिदै आफ्नो प्रतिबध्ता ब्यक्त गर्दै सबैलाई नेपाली नयाँ बर्षको २०८१ को शुभकामना दिनुभएको थियो।

केप कड नेपाली समाज, नेपाली कला र संस्कृतिको संरक्षण र प्रवर्द्धन गर्न २०११ मा केप कड, मासाच्युसेट्स, अमेरिकामा स्थापना गरिएको सामाजिक संस्था हो । यो संस्थाले नेपाली समुदायको हितका लागि विभिन्न कार्यक्रमहरू गर्दै आएको छ।