एउटा टाउको कटुवाले 

अर्को टाउको कटुवालाई भन्यो 

तँ हत्यारा होस 

अपराधी होस 

बेइमान होस 

फलानाको दलाल होस 

धोकेबाज होस

फटाहा होस 

भ्रष्ट होस  

अर्काले पनि कुम हल्लाउँदै भन्यो 

म होइन तँ हत्यारा होस 

अपराधी होस 

बेइमान होस 

फलानाको दलाल होस 

धोकेबाज होस

फटाहा होस 

भ्रष्ट होस  

दोहोरी चलिरहेकै थियो

यत्तिकैमा अचानक के भयो भयो 

एउटा टाउको कटुवाको      

फोन आयो बालुवाटार बाट 

म बालकोट हिँडे है 

अर्काले जबाफ फर्काए 

म स्वागत गर्न तल झरी सकेँ है 

एक छिनमा दुवैको भेट भयो 

दुवै किचिक्क हाँसे 

हात मिलाए, गला मिलाए र बासे,

भने दुवैले – हामी मिल्यौँ

अर्को टाउकाको मूल्य तोक्नेलाई मासे 

पररर ताली बजाए भक्तहरूले 

फिल्म रिलिज भयो !

दर्शक खचाखच छन् हेर्न 

सुपर हिट फिल्म कसले सक्छ फेर्न ? 

दुबै अहिले मस्त मस्त छन 

छतमा बसेर सुन्तला खान ब्यस्त छन  !!

– रामप्रसाद खनाल, डिसेम्बर ३०, २०२२