गोपाल प्रसाद भण्डारी
२०७७ कार्तिक २४ गते ३:५३ मा प्रकाशित
आकाशमा पार्थिव गन्ध छैन
जलीय अर्को रस वस्तु हुन्न
आकाशको वास्तव रूप छैन
आकाशमा स्पर्श विधान हुन्न।।१।।
आकाशको लक्षण शब्दमा छ
आकाशको श्रीगुण शब्द हुन्छ
आकाश यो व्यापक शान्त हुन्छ
स्वयम् छ रित्तो तर बस्न दिन्छ ।।२।।
हो पाँचमा एक आकाश तत्व
साक्षी भई बस्छ लिई महत्व
स्वतन्त्रता हो नभको प्रभुत्व
तटस्थता हो यसको शिवत्व ।।३।।
न आदि देखिन्छ न अन्त हुन्छ
अनन्ततामा प्रणवात्म हुन्छ
विशुद्धतामा गतिलो गनिन्छ
ब्रम्हाण्ड सारा नभमा अडिन्छ ।।४।।
यो राख्छ सारा ग्रहपिण्डलाई
पानी धरा तेज़ र वायुलाई
सम्मानले राख्छ सबै मिलाई
आकाश नै योग्य छ थेग्नलाई ।।५।।
अखण्ड आकाश छ दिव्य एक
मनुष्य पार्छन् भ्रमले अनेक
हो यो अविद्या यसमै छ लोक
आकाश टुक्रिन्न भए विवेक ।।६।।
हुँदैन आकाश कदापि कालो
आकाशको रड्०ग भनिन्छ नीलो
अध्यास हो यो व्यवहार जालो
रड्०गीन यो हुन्न छ शुद्ध पैलो ।।७।।
आकाशको हुन्न कुनै प्रकार
भनिन्छ षट्भावविकारसार
छन् लुप्त केही नभमा विकार
स्थायी छ आकाश र झेल्छ भार ।।८।।
छैनन् कुनै अड्०ग र काममार
हुन्नन् कुनै विध्न र छेकबार
आकाशमा छन् सब शब्दहार
आकाश आधार छ साधिकार ।।९।।
सक्तैन कोही नभ काट्न छिन्न
हल्लाउने तागत आँट हुन्न
समाउने व्यक्ति कदापि हुन्न
उडाउने तागत वस्तु छैन ।।१०।।
धरा नसक्ने दिन गन्ध शक्ति
दिंदैन पानी रसदार शक्ति
न तेजको चल्दछ रूप शक्ति
न वायुको स्पर्श रहन्छ मुक्ति ।।११।।
सोसिन्न भिज्दैन र जीर्ण छैन
घट्दैन बढ्दैन र जीर्ण छैन
झुक्दैन फुट्दैन र छिन्न छैन
झर्दैन सर्दैन र र दुष्ट छैन।।१२।।
सजीव निर्जीव कुनै नरोक्ने
ठूलो र सानो बलियो नतोक्ने
धनी भनी मान गरी नढोग्ने
आकाश नै हो सब वस्तु बोक्ने।।१३।।
आमा भने हुन्छ समानतामा
पिता भने हुन्छ विशालतामा
अर्धाड्गिनीझैं छ उदारतामा
आकाश हो यो गुरु योग्यतामा।।१४।।
न्यायी र भोगी अनि भद्रतामा
ध्यानी महात्मा सम सत्यतामा
ओङ्कारझैं यो छ पवित्रतामा
अतुल्य हो यो प्रभु सिर्जनामा।।१५।।
ज्ञानी र दानी सम उच्चतामा
हो यो प्रतिष्ठा प्रभुको विधामा
हो यो सुदामा सम मित्रतामा
अनन्य हो तत्व विशिष्टतामा।।१६।।
आकाश सत्ता छ अवर्णनीय
शरीरमा यो छ विचारणीय
छ व्याप्ति ठूलो र अचिन्तनीय
आकाशको देन छ शंसनीय।।१७।।
तुफान आँधी यसमा बहन्छन्
विमान उड्छन् सब दड्०ग हुन्छन्
पतड्०ग आनन्द लिएर घुम्छन्
राम्रा नराम्रा नभमा रहन्छन्।।१८।।
-गोपाल प्रसाद भण्डारी
प्रतिक्रिया