संविधानसँग बाझिएका दुई सय कानून संशोधन गर्न आग्रह

इनेप्लिज २०७५ मंसिर ११ गते १०:३१ मा प्रकाशित

काठमाडौँ, ११ मङ्सिर : सभामुख कृष्णबहादुर महराले नेपालको संविधानसँग बाँझिएका कानून तत्कालन संशोधन गर्न सरकारलाई आग्रह गर्नुभएको छ । राष्ट्रियसभा विधायन व्यवस्थापन समितिद्वारा आज यहाँ आयोजित ‘ऐन कार्यान्वयनमापन तथा अध्ययन अनुसन्धान सम्बन्धी एकदिने गोष्ठी’ को उद्घाटनमा उहाँले संविधानसँग बाँझिएका २०० कानून भएको हुँदा तत्काल संशोधन गर्न सरकारलाई आग्रह गर्नुभएको हो । सभामुख महराले भन्नुभयो,“संविधानसँग बाँझिएका कानून एक वर्षभित्र संशोधन गर्नुपर्ने व्यवस्था छ, २०० कानून संविधानसँग बाँझिएका छन्, छिटोभन्दा छिटो संसद्मा आओस् ।”

राष्ट्रियसभाका अध्यक्ष गणेश तिमिल्सनाले नयाँ संविधानअनुसार बनेका नयाँ १२४ र पुराना ३३९ कानून नयाँ संविधानअनुसार संशोधन गर्नुपर्ने जरुरी भएको बताउनुभयो । उहाँले आम नागरिकलाई सम्बोधन गरेर बनाइएका कानून प्रभावकारी भए-नभएको अध्ययन गर्न जरुरी भएको उल्लेख गर्नुभयो । कानून, न्याय तथा संसदीय मामिलामन्त्री भानुभक्त ढकालले समयअनुसार कानून निर्माण गर्नुपर्ने उल्लेख गर्दै कानून लागू गर्न र अप्ठ्यारो परेर दबाब आएमात्रै कानून संशोधन गर्ने चलन सही नभएको बताउनुभयो ।

उहाँले निर्माण भएका कानून सही रुपमा कार्यान्वयनमा आएको वा नआएको वा समयअनुकूल कानून परिमार्जन गर्नुपर्ने कुरामा सधँै ध्यान दिनुपर्नेमा जोड दिनुभयो । महान्यायाधिवक्ता अग्निप्रसाद खरेलले एउटा कानून १८–२० चरण प्रक्रिया पार गरेर बनाउनुपर्ने भएको हुँदा कानून बनाउनु पूर्व नै समाजमा त्यो कानून उपयुक्त वा समायाकूल हुने वा नहुने कुरामा अध्ययन गर्न जरुरी भएको बताउनुभयो ।

प्रतिक्रिया