गत असार ९ गते देखी बेपत्ता पोखरा महानगरपालिकाका सामाजिक महाशाखा प्रमुख, वरिष्ठ अधिकृत ओमराज पौडेलको शव तीन सातापछि फेला परेको छ । शनिबार विहान तनुहँको भिमादको सेती नदिकिनारमा शव फेला परेको छ ।

उनी हराएको २२ दिन पछि भिमादबाट शव फेला परेको जानकारी आएको कास्की प्रहरी प्रवक्ता डिएसपी रविन्द्र गुरुङले जानकारी दिए । असार ९ गते शनिबार विहान करिब ५ बजे तिर घरबाट निस्किएका उनी त्यसपछि वेपत्ता थिए । पौडेल वेपत्ता भएको खबर पाउने वित्तिकै कास्की प्रहरी सहितको रेस्क्यू टोली, क्यानोनिङ टोली समेतले सेती किनारमा खोजी गरिरहेको थियो । तनहुँ प्रहरीले पनि आफ्नो क्षेत्र अन्तर्गतको सेती नदि किनारमा निगरानी गरिरहेको थियो ।पौडेल घरबाट सरसफाइको कार्यक्रम जाने भन्दै निस्किएका थिए । पौडेलले घर छाड्नु अघि श्रीमतीलाई सम्बोधन गरेर एउटा नोट समेत छाडेका थिए । जुन पोखरा महानगरपालिकाले कास्की प्रहरीको रोहवरमा एक सातापछि सार्वजनिक पनि गरेको थियो ।