मंगलबार, कार्तिक ६ २०७५
काठमाडौं २२:४२
वासिङटन डिसी 12:57

टेक्ससमा नेपाली युवती द्वारा कार्यस्थलमा यौन उत्पीडन भएको भन्दै प्रहरीमा उजुरी

इनेप्लिज २०७५ जेठ २६ गते २:०२ मा प्रकाशित

अमेरिकाको टेक्सस राज्यको डालसमा एक नेपाली युवती द्वारा कार्यस्थलमा यौन उत्पीडन भएको भन्दै प्रहरीमा उजुरी दिएको खबर छ । उजुरीमाथि प्रहरीले अनुसन्धान सुरु गरेको सम्बद्ध स्रोतले जनाएको छ । डालसका कार्यस्थलहरुमा नेपाली युवतीहरूमाथि भएका भनिएका यौन उत्पीडन(सेक्सुअल ह्यारसमेन्ट) का घटनाहरूमध्ये ६ वटा घटना आफ्नो “नोटीसमा” आएको र त्यसमध्ये एउटा घटना प्रहरीसम्म पुगेको नेपाली समाज टेक्सासले जनाएको छ ।

घटनाको अनुसन्धान भइरहेको र सम्वेदनशील विषय पनि भएकोले प्रहरीमा परेको उजुरी तथा बाँकी अन्य घटनाहरूका सम्बन्धमा विस्तृत विवरण भने दिइएको छैन ।

यौन उत्पीडनका विषयमा जानकारी र जनचेतना अभिबृद्धि गर्ने उदेश्यले बिहीबार आयोजित अन्तर्क्रियामा नेपाली समाज टेक्सासकी महिला संयोजक आइशा ओझाले अहिलेसम्म, कार्यस्थलहरुमा नेपाली युवतीहरूमाथि भएका यौन उत्पीडनका ६ घटना, समाजको जानकारीमा आएको र त्यसमध्ये एउटा घटना प्रहरीसम्म पुगेको बताइन ।

त्यस्ता यौन उत्पीडनका घटनाहरूमा आफूहरूले सम्मान गर्दै आएका कतिपय “वेल नोन–सोसाइटी लिडर”(समाजमा चिर परिचित)को नाम समेत मुछिएको थाह पाउँदा सुरुमा आफूलाई डर लागेको उल्लेख गर्दै संयोजक ओृझाले भनिन “जो सुकै भए पनि दोषीहरूलाई कारबाही नभएसम्म हामी चुप लागेर बस्दैनौँ । हामीले सुरु गरेको यो मिसन, रोकिने छैन ।”

केही साता अघि सेतोपाटीका बाल जोशीले “यौन उत्पीडनका अपुष्ट खबरहरूले डालस नेपाली समुदाय तरंगित , पीडितलाई खुलेर बाहिर आउन आग्रह” शीर्षकको समाचार प्रकाशित गरेपछि यस विषयलाई लिएर डालसको नेपाली समुदायमा गम्भीर चासो र चिन्ता बढेको थियो ।

यो बिचमा, पीडितहरू अगाडी आउने क्रम पनि बढेको छ।

प्रतिक्रिया