टोकियो, १६ माघ । वैदेशिक रोजगारीका सिलसिलामा जापानमा रहेका एक नेपालीले आफ्नै कोठामा झुण्डिएर आत्महत्या गरेका छन् ।

कुक भिसामा जापान आएका नवलपरासीस्थित अमरपुरी ८ का ३३ वर्षीय सञ्जय खत्री आइतबार योकहामास्थित खानाजावा हाक्केई स्टेशन नजिकै आफ्नै कोठामा मृत अवस्थामा फेला परेका हुन् ।

पारिवारिक स्रोतका अनुसार खत्रीले सोमबार नेपाल फर्किने टिकट काटेका थिए । तर, घर फर्किने तयारी भइरहँदा अघिल्लो दिन नै अचानक आत्महत्या गरेपछि परिवारमा रुवाबासी मच्चिएको छ । उनको आत्महत्याको कारण खुल्न सकेको छैन ।

पारिवारिक स्रोतका खत्री केही समयदेखि मानसिक तनावमा रहेका थिए । उनका श्रीमती र ३ वर्षीय छोरा छन् ।