आइतबार, माघ ४ २०७७
काठमाडौं ११:३०
वासिङटन डिसी 00:45

काँग्रेस महाधिवेशन नजिकियो, नेतैपिच्छे सम्पर्क कार्यालय

इनेप्लिज २०७२ फागुन १५ गते ४:२४ मा प्रकाशित

congress.jpgकाठमाडौँ, १५ फागुन । नेपाली काँग्रेसको आसन्न १३ औँ महाधिवेशन नजिकिँदै जाँदा नेताहरुले सम्पर्क कार्यालयमार्फत आफ्नो पक्षमा निर्वाचन माहोल बनाउन सक्रिय देखिएका छन् ।

महाधिवेशनमा नेता र कार्यकर्तालाई आफ्नो पक्षमा आकर्षण गर्न सम्पर्क कार्यालय खोल्ने र भड्किला गतिविधि गर्ने होडबाजी नै चलेको छ ।

पार्टी सभापतिका आकाङ्क्षीदेखि पदाधिकारी र केन्द्रीय सदस्यसमेतले सम्पर्क कार्यालय खोलेको देखिएको छ ।

दूर गाउँ र जिल्लाबाट आएका नेता र कार्यकतालाई शीर्ष नेतासँगको पहुँच र साक्षात्कारका लागि सम्पर्क कार्यालय खोलिनु सान्दर्भिक छ नै । तर कतिपय नेताले महाधिवेशनको सङ्घारमा तडकभडकका साथ सम्पर्क कार्यालय खोली गुटगतरुपमा भेला गर्नुलाई स्वयम् नेता नै पार्टीमा विकृति भित्र्याउने काम भएको ठान्छन् ।

त्यसो त, सम्पर्क कार्यालयले काठमाडौँ बाहिरबाट आउने कार्यकर्तालाई आफ्ना नेतासँग सम्पर्क गर्न सहज बनाएको त छ नै, उनीहरुबीच नजिकबाट घुलमिल हुने अवसर पनि दिलाएको छ ।

यसरी नेतैपिच्छे व्यक्तिपिच्छेका सम्पर्क कार्यालयभन्दा पनि पार्टी केन्द्रीय कार्यालयलाई नै भेटघाटको मुख्य थलो बनाउँदा उपयोगी हुने कतिपय नेताको भनाइ छ ।

महाधिवेशनको सङ्घारमा नेता कार्यकर्तालाई पायक पर्ने सहज ठाउँमा सम्पर्क कार्यालय खोलिनु सान्दर्भिक हुन्छ भन्नुहुन्छ नेपाली काँग्रेसका केन्द्रीय सदस्य अर्जुननरसिंह केसी ।

“कार्यकर्तालाई पार्टी कार्यालय पुग्न टाढा हुने र नेतासँग भलाकुसारी गर्न असहज हुने भएकाले महाधिवेशनको सङ्घारमा सम्पर्क कार्यालय खोलिनु सामान्य हो, तर यसलाई तडकभडक नगरी सामान्य भेटघाटको थलोका रुपमा मात्र उपयोगमा ल्याइनुपर्दछ” – उहाँले भन्नुभयो ।

पार्टी सभापति, महामन्त्रीलगायतका पदाधिकारीले सम्पर्क कार्यालय खोल्नुलाई स्वाभाविक मानिए पनि केन्द्रीय सदस्यले समेत व्यक्तिपिच्छे सम्पर्क कार्यालय खोल्नुलाई कतिपयले स्वाभाविक मानेका छैनन् ।

केन्द्रीय सदस्य शङ्कर भण्डारीले सम्पर्क कार्यालय खोल्दा अनावश्यक खर्च बढाउने मात्र नभई गुटगत प्रवृत्ति मौलाउने बताउनुहुन्छ ।

महाधिवेशनबाट एकताको सन्देश प्रवाह गर्न नेताले पार्टी कार्यालयलाई नै सम्पर्क र भेटघाटका लागि प्रयोग गर्नसके नेता कार्यकर्तामा सकारात्मक सन्देश जाने उहाँको तर्क थियो ।

महाधिवेशनमा सभापतिको आकाङ्क्षी रहनुभएका काँग्रेस कार्यवाहक सभापति रामचन्द्र पौडेलले पार्टी केन्द्रीय कार्यालय सानेपा र बोहोराटारस्थित आफ्नै निवासमा नेता र कार्यकर्तासँग भेटघाटको थलो बनाउनु हुने उहाँका सहयोगी चिरञ्जीवी अधिकारीले बताउनुभयो ।

पार्टी समापतिका अर्का आकाङ्क्षी शेरबहादुर देउवाले केही महिना अघिदेखिनै नयाँबानेश्वरमा सम्पर्क कार्यालय खोलेर आफ्नो पक्षका कार्यकर्तासँग संवाद गर्दै आउनुभएको छ । त्यहाँ काठमाडौँ बाहिरबाट आउने नेता कार्यकर्ताको सम्पर्क कार्यालयमा भीड लाग्ने गरेको छ ।

महाधिवेशन नजिकिँदै जाँदा पार्टी केन्द्रीय कार्यालयमा भन्दा सम्पर्क कार्यालयमा चहलपहल र भीडभाड बढ्ने गरेको छ ।

पार्टी सभापतिका आकाङ्क्षी महामन्त्री कृष्णप्रसाद सिटौलाले गैरीधारामा सम्पर्क कार्यालय खोल्नुभएको छ भने अर्का सभापतिका आकाङ्क्षी महामन्त्री प्रकाशमान सिंहले बिजुलीबजारस्थित पुरानो सम्पर्क कार्यालयलाई प्रयोग गरिरहनुभएको छ ।

सभापतिका अर्का आकाङ्क्षी सुजाता कोइरालाले मण्डिखाटारस्थित आफ्नै निवासलाई सम्पर्क कार्यालय बनाउनुुभएको छ । त्यस्तै महामन्त्रीका आकाङ्क्षी केन्द्रीय सदस्य अर्जुननरसिंह केसीले डिल्लीबजारमा सम्पर्क कार्यालय खोल्नुभएको छ ।

केन्द्रीय सदस्य गगनकुमार थापा, डा शेखर कोइराला, शशाङ्क कोइराला, चन्द्र भण्डारी, शङ्कर भण्डारी, मीन विश्वकर्मा, ज्ञानेन्द्रबहादुर कार्कीलगायतका नेताले छुट्टै सम्पर्क कार्यालय खोलेर भेटघाटलाई तीव्रता दिनुभएको छ ।

केन्द्रीय सदस्य मीन विश्वकर्माले बहुदलीय संसदीय पद्धतिमा नेतृत्वको होडबाजीलाई स्वाभाविक मान्नुपर्ने धारणा व्यक्त गर्दै आफ्नो सम्पर्क बढाउन धेरै नेताले काठमाडौँमा सम्पर्क कार्यालय खोलेको स्वीकार्नुभयो ।

“सम्पर्क कार्यालय खोल्नु सान्दर्भिक हो, तर कतिपयले होटल र पार्टी प्यालेसलाई सम्पर्क कार्यालय बनाई तडकभडक गर्ने गरेका छन्, यसले पार्टीलाई विकृत तुल्याउँछ” – विश्वकर्माले भन्नुभयो ।

पार्टी कार्यालयमा निजी कार्यकक्ष नहुने र पदाधिकारीलाई नै अपुग हुने भएकाले आफ्ना नेता र शुभेच्छुकसँग भलाकुसारी गर्न सहज स्थानमा सम्पर्क कार्यालय खोलिएको नेताहरुको भनाइ छ ।

यसपटक लोकतन्त्रको हिमायती मानिने काँग्रेस पार्टीभित्र कमजोर बन्दै गएको लोकतन्त्र अभ्यासलाई सुदृढ गरी पार्टीको विधानअनुरुप योग्य नेतृत्व चयनमा युवापुस्ताको झुकाव देखिएको छ ।

महासमिति सदस्य नयनसिंह महरले आन्तरिक लोकतन्त्रलाई बलियो बनाउन र पार्टीको विधानअनुरुप सङ्गठनलाई सुदृढ तुल्याउन परिपक्व नेतृत्व चाहिने बताउनुभयो । काँग्रेसको १३ औँ महाधिवेशन यही फागुन २० देखि २३ गतेसम्म काठमाडौँ हुँदैछ । महाधिवेशनका लागि अहिले २५ प्रतिशत महाधिवेशन प्रतिनिधि काठमाडौँ आइसकेको अनुमान छ ।

प्रतिक्रिया