अवसरको खोजीमा, भनौ या बाध्यतामा
छु म अहिले, टाढा विदेशी भूमीमा
संघर्ष गर्दागर्दै यतै, मरें भने खुत्त्रुक्कै
मेरो पार्थिब शरीरलाई, किमार्थ यहाँ नजलाइदिनु
चन्दा उठाएर भए पनि, नेपाललाई बुझाइदिनु
नेपाललाई बुझाइदिनु |
पर्दैन सोध्न मेरो नाम, नेपाली भनिदिए पुग्दछ
पर्दैन खोज्न ठेगाना, नेपाल लेखिदिए पुग्दछ
छोडाएर अर्काको बस्त्र, सूर्य र चन्द्र ओढाइदिनु
बैरङ बनाउनु परे पनि, नेपालमा नै पठाइदिनु
नेपालमा नै पठाइदिनु |
लेख्नै परे अन्तिम वाक्य, “जय नेपाल!” लेखिदिनु
सोध्नै परे अन्तिम इच्छा, स्वर्ग-नर्क नासोधिदिनु
नेपालको पन्चतत्वले, बनेको यो मेरो शरीरलाई
जसरी हुन्छ कृपया, नेपालमा नै पठाइदिनु
नेपालमा नै पठाइदिनु |
———समाप्त—————–
रचना- गौतम “उदय”
फेब्रुअरी १८, २०१६
प्रतिक्रिया