बाढीपहिरो गएको यतिका समय बितेपनि राज्यका तर्फबाट उल्लेख्य सहयोग नभएको भन्दै केही दिनअघि गठन भएको ताप्लेजुङ जिल्लाको संयुक्त बाढीपहिरोपीडित समितिले विभिन्न सङ्घसंस्थाबाट प्राप्त राहत गैरपीडितसम्म पुगेको गुनासो पनि गरेको छ ।

आइतबार बुझाइएको ज्ञापनपत्रमा उल्लेख भएअनुसार पहिरो प्रभावितलाई परिचयपत्र वितरण गर्नुपर्ने, भूकम्पपीडितलाई भन्दा बढी सेवासुविधा उपलब्ध गराउनुपर्ने माग गरिएको छ । यसअघि वितरण भएका विभिन्न खाद्यान्न, नगद साथै खानेपानीको पाइप वितरण समानुपातिक नभएको साथै गैरपहिरोपीडितले धेरै पाएको समितिका सहसचिव पवन पुरीले बताउनुभयो ।

यस्तै, यसअघि वितरण भएका राहत सामग्री वितरणमा भएको अनियमितताबारे पनि छानबिन गर्न उनीहरुले स्थानीय प्रशासनलाई आग्रह गरेका छन् ।

जाडोको समयमा सामान्य टहरा र आफन्तकामा बस्दै आएका पीडित परिवारलाई अहिले समस्या भएको सो समितिले जनाएको छ । विभिन्न सङ्घसंस्थाले उपलब्ध गराएको खाद्यान्नलगायतका सामग्री सकिँदै गएकाले थप सङ्कट आउन लागेको उनीहरुको भनाइ छ ।

ज्ञापनपत्र बुझ्दै प्रमुख जिल्ला अधिकारी कमलबहादुर थापाले राज्यले पुनर्वासका लागि पहल गरिरहेको भन्दै स्थानीय तहमा पनि गाविस सचिवको अध्यक्षतामा दैवी प्रकोप उद्धार समितिको गठन गर्न आवश्यक भएको बताउनुभएको छ ।

गत जेठ २७ र २८ गते यस जिल्लाका आधादर्जन गाविसमा गएको बाढीपहिरोमा परी ५९ जनाले ज्यान गुमाएका थिए भने दर्जनौँ परिवार विस्थापित भएका थिए । विस्थापित केही परिवार अहिले आफन्तकामा बसेका छन् भने केहीले टहरा बनाएर बसेका छन् । कमाइ गर्ने खेतबारी नै पहिरोले बगाएपछि अहिले खेती गर्ने जमिन नहुँदा धेरैलाई समस्या भएको पीडितको गुनासो छ ।