सीमा स्तम्भ मर्मत हुँदै

इनेप्लिज २०७२ माघ ७ गते ७:५३ मा प्रकाशित

भद्रपुर, ७ माघ । झापा जिल्लाअन्तर्गत नेपाल भारतको सीमा क्षेत्र दशगजामा सीमा स्तम्भको मर्मतसम्भार एवम् निर्माण कार्य सुरु भएको छ ।

नापी विभाग काठमाडौँबाट आएका टोलीले दशगजा क्षेत्रमा रहेका सीमा स्तम्भको पहिचान र निर्माण कार्य गरिरहेको टोली प्रमुख सुशील डङ्गोलले जानकारी दिनुभयो । टोलीले १०१ नम्बरबाट कार्य थालनी गरी पुराना १०३ वटाको मर्मतसम्भार एवम् रङ्गरोगन गरिसकेको छ भने नौवटा नयाँ स्तम्भ स्थापना गरिएको छ ।

सीमा स्तम्भ हराएका ठाउँमा नेपाल–भारत दुबै देशका प्रतिनिधिले बिन्दु पत्ता लगाएर सीमा स्तम्भ स्थापना गरिरहेको बताइएको छ । दशगजा क्षेत्रमा कतिपय स्थानमा भारतीय नागरिकले दशगजालाई अतिक्रमण गरी घर बनाउने र तरकारी खेती गर्ने गरेको पाइएकाले त्यसको पनि लगत लिने काम भइरहेको नापी टोलीका प्रमुख डङ्गोलले जानकारी दिनुभयो । झापा, मोरङ र सुनसरीमा पनि दशगजा क्षेत्रमा सीमा स्तम्भको खोजी, पहिचान र निर्माण आगामी असार मसान्तसम्ममा गरिसक्ने टोलीको योजना छ ।

प्रतिक्रिया