पाँचथर, १५ असोज । जिल्लामा आव ०७१/७२ को भदौ सम्ममा ४९१ जनाले निःशुल्क एचआइभी एड्ससम्बन्धी जाँच तथा परामर्श लिएका छन् । त्यसमा एकजनामा पनि एचआइभी एड्स पोजेटिभ नभेटिएको जिल्ला स्वास्थ्य कार्यालयले जनाएको छ ।
यस आवको भदौ महिनामा मात्रै २६ जनालाई एचआइभी एड्ससम्बन्धी निःशुल्क जाँच गरिएको कार्यक्रमका प्रमुख व्यक्ति ओमप्रकाश यादवले जानकारी दिनुभयो ।
उहाँका अनुसार २६ जनामध्ये दुईजनामा भने एचआइभी एड्स पोजेटिभ देखिएको छ । उनीहरुको उपचारका लागि कोसी अञ्चल अस्पताल विराटनगरमा सिफारिस गरिएको उहाँले बताउनुभयो ।
सवारी चालकले दोब्बर बढी भाडा उठाउन थालेपछि अनुगमन सुरु
भारतले गरेको अघोषित नाकाबन्दीसँगै सवारी चालकले तोकिएको भन्दा झन्डै दोब्बर भाडा उठाउन थालेपछि जिल्लामा अनुगमन गर्न थालिएको छ ।
यसअघि बुधबार सदरमुकाम फिदिम–याङ्नाम सडकखण्डमा सवारी चालकले तोकिएको भाडाभन्दा झन्डै दोब्बर भाडा उठाएको जनगुनासो आएपछि अनुगमनलाई कडा बनाएको प्रमुख जिल्ला अधिकारी पुरुषोत्तम घिमिरेले जानकारी दिनुभयो ।
बिहीबारबाट थालिएको जाँच अझै केही दिन फरक–फरक रुटमा गरिने प्रहरी नायब उपरीक्षक कृष्णकुमार कोइरालाले जानकारी दिनुभयो । नेपालीहरुको चाडपर्वसमेत नजिकिएकाले अनुगमनलाई निरन्तरता दिइने उहाँले बताउनुभयो ।
प्रतिक्रिया