जिल्ला प्रहरी कार्यालय झापाले दिएको तथ्याङ्कअनुसार आर्थिक वर्ष २०७१/७२ मा एक सय ३८ वटा घरेलु हिंसाका घटना दर्ता भएका छन् ।

आव २०६९/७० मा ६० वटा घरेलु हिंसाका घटना दर्ता भएकामा ०७०/७१ मा उक्त सङ्ख्या घटेर ४० मा झरेको थियो । आव २०७१/७२ मा उक्त सङ्ख्या बढेर एक सय ३८ पुगेको हो । घरेलु हिंसाका कारणमा वैदेशिक रोजगार, अपरिपक्व प्रेम सम्बन्ध, गरिबी, बहुविवाह, व्यक्तिगत चरित्र, मापसे, झैँझगडा, कुटपिट, धाँक, धम्की, लाञ्छनालगायत रहेका छन् ।

आव ०६९/७० मा बहुविवाहसम्बन्धी ३२ उजुरी दर्ता भएकामा २२ उजुरी कानुनी कारबाहीका लागि मुद्दा चलाएको थियो भने १२ वटामा मिलापत्र भएको थियो । आव २०७०/७१ मा २५ वटा उजुरी दर्ता भएकामा २२ वटा उजुरीमा मुद्दा चलाएको थियो भने तीनवटामा मिलापत्र भएको थियो ।

आव २०७१/७२ मा बहुविवाहसम्बन्धी २७ उजुरी दर्ता भएकामा २२ वटामा मुद्दा चलाएको र पाँचवटामा मिलापत्र भएको जिल्ला प्रहरी कार्यालय झापाका प्रवक्ता प्रहरीनायब उपरीक्षक भीमबहादुर दाहालले बताउनुभयो । उहाँका अनुसार कार्यालयमा पुरुष हिंसाका पाँचवटा निवेदनसमेत परेका छन् ।