नेप्से छ अङ्कले बढ्यो

इनेप्लिज २०७२ साउन २३ गते ११:५७ मा प्रकाशित

nepseकाठमाडौँ, २३ साउन । साताको नेप्से परिसूचक पहिलो दिनको तुलनामा ६.२२ अङ्कले बढेको छ । गत साता पहिलो दिनको तुलनामा २५.९७ अङ्कले घटेको थियो ।

सो साताको अन्तिम दिन परिसूचक १०४०.३६ अङ्कमा पुगेको नेपाल स्टक एक्सचेन्जले जनाएको छ ।

यस साता स्टक एक्सचेन्जमा १७२ कम्पनीका १७ हजार ४८२ कारोबारबाट रु दुई अर्ब ४७ करोड ६० लाख ९३ हजार बराबरका ४८ लाख ४३ हजार ७६० कित्ता सेयर खरिद बिक्री भएका छन् । कारोबार रकम गत साताको भन्दा १८.२५ प्रतिशत कम हो ।

गत साता १७४ कम्पनीका १५ हजार ४१६ कारोबारबाट रु तीन अर्ब तीन करोड २६ लाख ९३ हजार बराबरका ७१ लाख ९४ हजार ७२० कित्ता सेयर खरिद बिक्री भएका थिए ।

यो साता सबैभन्दा बढी बिमा समूहको परिसूचकमा २१५.८७ अङ्कले वृद्धि भएको छ । समूहगत परिसूचकमा यो साता वाणिज्य बैंक, होटल, उत्पादनमूलक र अन्य क्षेत्रमा कमी आएको छ । त्यसैगरी विकास बैंक, वित्त कम्पनी र जलविद्युत् समूहको परिसूचकमा सुधार आएको छ भने व्यापार समूहको परिसूचकमा भने कुनै परिवर्तन भएको छैन ।

‘क’ वर्गका कम्पनीको कारोबार मापन गर्ने सेन्सेटिभ इन्डेक्स पहिलो दिनको तुलनामा ०.१८ अङ्कले बढेर २२२.७८ अङ्कमा आइपुगेको छ ।

यस साता कारोबार रकमको आधारमा नेपाल इन्भेस्टमेन्ट बैंक संस्थापक अग्रस्थानमा छ । त्यसैगरी कारोबार भएको सेयर सङ्ख्याका आधारमा पनि नेपाल इन्भेस्टमेन्ट बैंक संस्थापक अग्रस्थानमा छ । त्यसैगरी कारोबार सङ्ख्याका आधारमा प्राइम कमर्सियल बैंक अग्रस्थानमा रहेको छ ।

यस साता नेपाल स्टक एक्सचेन्जको कारोबार कक्ष नियमित कारोबारका लागि पाँच दिन खुला रह्यो । यस साता पनि ऋणपत्रतर्फ संस्थागत तथा सरकारी ऋणपत्रहरुको कुनै पनि कारोबार भएन ।

यो साता सेञ्चुरी कमर्सियल बैंकको १२ लाख बोनस सेयर सूचीकृत गरिएको छ ।

प्रतिक्रिया