सोलुखुम्बु, २३ साउन । सोलुखुम्बुमा क्षयरोग पहिचान भएर नियमित औषधि सेवन गरिरहेका २८६ जना छन् भने पहिचान नभएका पनि त्यही सङ्ख्यामा हुन सक्ने अनुमान गरिएको छ ।

जिल्ला स्वास्थ्य कार्यालय सोलुखुम्बुका क्षयरोग कुष्ठरोग अधिकृत कर्मचन्द्र राजवंशीका अनुसार जिल्लामा क्षयरोगका पुराना रोगी पनि रहेका छन् भने नयाँ देखापर्ने क्रम पनि उत्तिकै रहेको छ । जिल्लामा पनि टाप्टिङ, गोराखानी र केरुङ गाविसका शेर्पा जातिमा सबैभन्दा बढी क्षयरोगीको सङ्ख्या रहेको उहाँले बताउनुभयो ।
यसैबीच क्षयरोगीलाई भदौ महिनादेखि समुदायमा आधारित उपचार विधि (सिवी डट्स) कार्यक्रम सञ्चालन गर्न लागिएको जिल्ला स्वास्थ्य कार्यालय सोलुखुम्बुले जनाएको छ ।