आइतबार, असार १९ २०७९
काठमाडौं ००:१०
वासिङटन डिसी 14:25

भाउजुको हत्या गर्ने दम्पती पक्राउ

इनेप्लिज २०७२ साउन २१ गते १५:२० मा प्रकाशित

hatya-imageभीमदत्तनगर, २१ साउन । भाउजुसँगको जग्गा विवादका कारण कञ्चनपुरको बेलौरी नगरपालिकामा एक दम्पतीले एकैघरका भाउजुलाई कुटपिट गरी हत्या गरेको जिल्ला प्रहरी कार्यालयले जनाएको छ ।

गत शुक्रबार देवर र देउरानीको कुटाइबाट घाइते भएकी बेलौरी नगरपालिका–१० की ५० वर्षीया रामलल्ली बोटको उपचारका क्रममा मृत्यु भएको थियो ।

प्रहरी अनुसन्धानबाट मृतक बोटलाई देवर वीरबहादुर बोट र देउरानी उर्मिला बोटले जग्गा विवादका कारण कुटपिट गर्दा मृत्यु भएको देखिएको जिल्ला प्रहरी कार्यालयका प्रहरी उपरीक्षक किशोर कुमार दाहालले बताउनुभयो ।

“मृतकबाट अंश छिन्न हत्या गरिएको देखिन्छ,” दाहालले भन्नुभयो – “अभियुक्तलाई सर्वस्वसहित कैद हुन सक्छ ।” अभियुक्त बोट दम्पतीलाई प्रहरीले नियन्त्रणमा लिई कारबाही प्रक्रिया अघि बढाइसकेको छ । प्रहरीका अनुसार कुटपिटमा संलग्न थप एकजना फरार रहेको छ ।

चोरीमा ज्वाइँ, छोरी र ससुरा पक्राउ

त्यसैगरी, प्रहरीले केही दिनअघि भीमदत्तनगरको इन्टरनेसनल हायर सेकेन्ड्री स्कुलको चमेनागृह र लोकप्रिय सुनचाँदी पसलमा चोरी गर्ने तीनजनालाई नियन्त्रणमा लिएको छ ।

चोरीमा संलग्न लक्ष्मण सुनार, शारदा लुहार र प्रकाश बोहरालाई नियन्त्रणमा लिइएको हो । प्रहरीका अनुसार लक्ष्मण शारदाका बुबा र प्रकाशका ससुरा हुन् । तीन जनाको समूहले चमेनागृहबाट रु १० हजार नगद र मोबाइल सेट चोरेका थिए भने सुनचाँदी पसलबाट अन्दाजी सात÷आठ तोला सुन चोरेका थिए ।

प्रतिक्रिया