वन्यजन्तु संरक्षणको क्षेत्रमा कार्यरत स्वदेशी तथा विदेशी सङ्घसंस्थाले हिउँचितुवाको विषयमा नमखुलेकमा आएर अध्ययन गर्न थालेपछि त्यसलाई स्थानीय ‘हिउँचितुवा’को राजधानी घोषणा गर्न माग गरेका छन् । यो याममा नेपालसहित अमेरिका, जापान र अस्ट्रेलियाबाट चारवटा समूहले यही क्षेत्रमा हिउँचितुवाको अध्ययन गरेको जोमसोम ठिनीका स्थानीय युवा निरज थकालीले जानकारी दिनुभयो ।

“विशेष प्रकारको क्यामेरा लिएर उनीहरु यो क्षेत्रमा एक हप्तासम्म बस्छन्, हिउँचितुवा नजिकै नदेखे पनि क्यामेराका सहायताले पूरै अध्ययन गर्छन्”, उहाँले भन्नुभयो । उच्च हिमाली क्षेत्रमा पाइने हिउँचितुवा लोभ हँुदै जान थाले पनि नमखुलेक आसपासका क्षेत्रमा करिब ५० भन्दाभन्दा बढी देखिएको अध्ययनकर्ताले बताएका छन् ।

जिल्ला सदरमुकाम जोमसोमदेखि ठिनी हुँदै नमखुलेक पुग्न सकिन्छ । त्यहाँसम्म पुग्न स्थानीयवासीले सामान्य पदमार्ग निर्माणसमेत गरेका छन् । उक्त लेकमा स्थानीयवासीले चौँरीगाईसमेत पाल्दै आएका छन् । वातावरणीय असन्तुलनका कारण पछिल्लो समय हिउँचितुवाको सङ्ख्यामा कमी आएको वन्यजन्तु संरक्षणविद्ले बताउँदै आएका छन् । “अध्ययनकर्ताले क्यामेरा ट्र्यापिङमा राखेर बसेका हुन्छन्, त्यसले पूरै तस्बिर लिन्छ अनि त्यसको अध्ययन हुन्छ”, थकालीले भन्नुभयो । नमखुलेक आसपासमा प्रशस्त चरण क्षेत्र, ओडार र उचित हावापानीका कारण हिउँचितुवाको सङ्ख्या बढ्दै गएको बताइएको छ ।