बढ्दो दुर्घटना न्यूनीकरण गर्न जनचेतनामूलक अभियान सुरु

म्याग्दी, २० साउन । बढ्दो दुर्घटना न्यूनीकरण गर्न अनेरास्ववियु म्याग्दीले तीनदिने ट्राफिक व्यवस्थापनसम्बन्धी जनचेतनामूलक अभियान सञ्चालन गरेको छ । उक्त अभियानको एक कार्यक्रमबीच मङ्गलबार शुभारम्भ गरिएको छ ।

मानवीय कमजोरीकै कारण धेरैजसो सवारी दुर्घटना निम्तने भएकाले जनसमुदायमा ट्राफिक व्यवस्थापनसम्बन्धी जनचेतना जगाउने उद्देश्यले कार्यक्रम सुरु गरिएको अनेरास्ववियु म्याग्दीका अध्यक्ष प्रकाश पौडेलले जानकारी दिनुभयो ।

अभियानको शुभारम्भ गर्दै नेकपा (एमाले) म्याग्दीका अध्यक्ष हरिकृष्ण श्रेष्ठले साँघुरा सडकमा ट्राफिक नियमको पालना नगर्दा सवारी दुर्घटना बढेको बताउँदै सडकमा सवारी चलाउने र पैदलयात्रा गर्ने दुबैलाई जनचेतना जगाउन अभियानबाट सहयोग पुग्ने विश्वास व्यक्त गर्नुभयो ।

‘‘सवारी दुर्घटनामा सानो कमजोरीले ठूलो क्षति हुने गर्छ, चालक र सर्वसाधारणले सावधानी अपनाउन सके सम्भावित दुर्घटना हुनबाट जोगिन सकिन्छ, यसका लागि ट्राफिक नियमको पूर्ण रुपमा पालना हुन जरुरी छ”, उहाँले भन्नुभयो ।

कार्यक्रममा जिल्ला ट्राफिक प्रमुख रामचन्द्र क्षत्री, नेकपा (एमाले) म्याग्दीका सचिव बालकृष्ण सुवेदी, सचिवालय सदस्य एवम् विद्यार्थी इन्चार्ज दीपक कार्कीलगायतले सहरी क्षेत्रमा बढ्दो जनघनत्व, साँघुरा सडक र तीव्र गतिमा सवारी चलाउने जस्ता कारणले सवारी दुर्घटना बढ्ने गरेको भन्दै सडक अनुशासनको पालना गराउनुपर्नेमा जोड दिनुभएको थियो ।