नगरपालिका कार्यालयले सङ्घीय मामिला तथा स्थानीय विकास मन्त्रालयको ९० प्रतिशत र नगरपालिकाको जगेडा कोषबाट १० प्रतिशत रकम व्यहोर्ने गरी रु ६५ लाखको लागतमा दमकल खरिद गरी सेवा सुरु गरेको हो ।

नयाँ खरिद गरिएको दमकलमा पाँच हजार लिटर पानी बोक्ने क्षमता, अक्सिजन मास्क, दुई वटा सिलिन्डर, वाटर मनिटर र एक हजार ४०० लि प्रतिमिनेटमा पानी फ्याँक्न सक्ने क्षमता रहेको छ ।

नगरपालिकाको गत वर्षको परिषद् बैठकले नयाँ दमकल खरिद गर्ने निर्णय गरेको थियो । नयाँ र पुरानो गरी नगरपालिका कार्यालयसँग दुईवटा दमकल तयारी अवस्थामा रहेको नगरपालिकाका इन्जिनियर हिमालयसिंह ऐरले बताउनुभयो ।

“विगतमा २५ वर्ष पुरानो प्रविधियुक्त दमकलले नगरपालिकाले आगलागीका घटना नियन्त्रण गर्ने कार्य गर्दै आएकोमा नयाँ दमकल थपिएपछि सहजरुपमा आगलागीका घटना नियन्त्रण गर्न सकिन्छ” उहाँले भन्नुभयो ।