शुक्रबार, असार ४ २०७८
काठमाडौं ०७:३३
वासिङटन डिसी 21:48

चारआलीस्थित सर्पदंश उपचारकेन्द्रमा बिरामीको चाप

इनेप्लिज २०७२ साउन १० गते १२:२२ मा प्रकाशित

snakeकाँकडभिट्टा (झापा), १० साउन । झापाको चारआलीस्थित सर्पदंश उपचार केन्द्रमा सर्पदंशका विरामीको चाप बढ्न थालेको छ ।

नेपाली सेनाको कालीबहादुर गणको प्राविधिक सहयोगमा सञ्चालित केन्द्रमा २०७२ बैशाखदेखि असार मसान्तसम्मको तीन महिनामा सर्पले डसेर उपचार गर्न आउनेको सङ्ख्या ४२४ पुगेको छ । २०७१ सालको यही अवधिमा ३५४ जना सर्पले डसेको उपचार गर्न आएका थिए ।

नेपाली सेनाको प्राविधिक सहयोगमा सञ्चालन हुने गरी २०६२ सालमा जनसहयोगमा उपचार केन्द्रको स्थापना गरिएको हो । केन्द्रको व्यवस्थापन स्थानीयद्वारा गठित समितिले गर्दै आएको छ ।

केन्द्रको स्थापनापछि झापा, इलाम जिल्लासहित भारतको दार्जीलिङबाट आउने बिरामीले यहाँबाट सर्पदंशको भरपर्दो उपचार पाउँदै आएका छन् ।

एक दशकमा यस केन्द्रमा १० हजार ९६६ जना सर्पदंशका बिरामी उपचारका लागि भर्ना भएको कालीबहादुर गणले जनाएको छ ।

केन्द्रमा २०७१ सालमा एक हजार १९३ जना र २०७० सालमा एक हजार ५२९ जना उपचारका लागि भर्ना भएका थिए ।

झापामा थुप्रै किसिमका सर्प पाइए पनि गोमन र करेत सबैभन्दा बिषालु हुने केन्द्रका प्राविधिक बताउँछन् । विषालु सर्पले डसेपछि उपचार गराउन ढिला भएमा बिरामीको ज्यान जाने गर्छ ।

बिषालुमध्ये गोमन दिउँसो र करेत राति आहारका लागि सक्रिय हुने हुँदा त्यही समयमा मानिसलाई डस्ने जोखिम रहेको प्राविधिकहरु बताउँछन् ।

केन्द्रले व्यवस्थापन समितिको निर्णयअनुसार बिरामीको उपचारका लागि रु.५० सेवा शुल्क लिने गरेको छ ।

प्रतिक्रिया