बिहीबार, असार १० २०७८
काठमाडौं ००:३०
वासिङटन डिसी 14:45

बन्दले असर गर्दैन, मुस्ताङ खुल्ला छ

इनेप्लिज २०७२ साउन ८ गते ११:४८ मा प्रकाशित

Mustang_district_locationमुस्ताङ, ८ साउन । नेत्रविक्रम चन्द नेतृत्वको नेकपा माओवादीले आह्वान गरेको नेपाल बन्दको प्रभाव हिमाली जिल्ला मुस्ताङमा भने परेको छैन । यहाँका बजार, उद्योगधन्दा, विद्यालय र यातायातका साधन निर्वाध रुपमा सञ्चालन भइरहेका छन् ।

पर्यटकीय जिल्लामा बन्दको समयमा पनि पर्यटकको चहलपहल देख्न सकिन्छ । अन्तर्राष्ट्रियस्तरमा नकारात्मक सन्देश जाने भन्दै यसअघि नै यहाँका राजनीतिक दल र सरोकारवाला निकायबीच कुनै पनि बहानामा बन्द नगर्ने सहमति भएको थियो ।

चन्द नेतृत्वको माओवादीको प्रभाव कम र सबैमा बन्द गर्न हुँदैन भन्ने चेतनाका कारण बन्द नभएको बताइएको छ । मुस्ताङका प्रमुख जिल्ला अधिकारी नरहरि बरालले जिल्लाभर सवारी साधन सञ्चालन भएको बताउनुभयो ।

“यहाँ बन्दको कुनै प्रभाव छैन, पर्यटकलाई यहाँबाट अन्य जिल्लामा जान भने केही समस्या भएको पाएका छौँ”, उहाँले भन्नुभयो –“मुस्ताङमा कुनै पनि संस्थाले गरेको बन्दले असर गर्दैन ।”

यसैबीच, बन्दका कारण म्याग्दीमा भने जनजीवन प्रभावित भएको बताइएको छ । म्याग्दीबाट मुस्ताङ आउने कुनै पनि सवारी साधन सञ्चालन हुन नसक्दा मुस्ताङको घासाबाट पर्यटक बाहिर जान नसकेको बताइएको छ ।

प्रतिक्रिया