अठार चिकित्सकको दरबन्दी रहेको अस्पतालमा सरकारले हालै नौ जनाको दरबन्दी थप गरी २७ पुर्‍याए पनि दरबन्दीका एक चिकित्सक पनि कार्यरत रहेका छैनन् ।

दुई जना करारमा, अस्पताल विकास समितिअन्तर्गतका तीन जना चिकित्सक र अस्पतालका सुपरिटेन्डेन्टसमेत काजमा कार्यरत रहेका छन् ।

एघारौँ तहका तीन विशेषज्ञसहितको चिकित्सकको दरबन्दी रहेको अस्पतालमा एक जनासमेत चिकित्सक कार्यरत नहुँदा अप्ठेरो परेको महाकाली अञ्चल अस्पताल विकास समितिका अध्यक्ष खेमलाल घिमिरेले बताउनुभयो ।

“दरबन्दीअनुसारका चिकित्सक नआउँदा बिरामीलाई सेवा प्रदान गर्नका लागि चार जना करारका चिकित्सकको व्यवस्था गर्न लागेका छौँ” उहाँले भन्नुभयो । उहाँका अनुसार दरबन्दीमा कार्यरत चिकित्सक नहुँदा विशेषज्ञ सेवा लिनका लागि अन्यत्र जानुपर्ने अवस्था रहेको छ ।

संविधानसभाका सभासद् कलसा महराले पटकपटक अञ्चल अस्पतालको समस्याका बारेमा सदनमा कुरा उठाए पनि समस्या समाधान हुन नसक्दा चिन्तित भएको बताउनुभयो ।

सामान्य बिरामीको उपचार अस्पतालमै गरिँदै आएको भए पनि जटिल प्रकारका बिरामीले उपचारका लागि चर्का शुल्क तिर्दै भारतीय निजी मेडिकलमा उपचार गराउनुपर्ने अवस्था रहेको छ ।