पर्याप्त मात्रामा वर्षा नहुनु र भत्किएका मूल नहरको हालै मर्मत गरिएकाले सो क्षेत्रमा सिँचाइ हुने डुम्राहा शाखामा पानी नछोडिएकाले एक प्रतिशत पनि रोपाइँ हुन नसकेको हो । करिब दुई सातादेखि खेतीलाई पुग्ने वर्षा भएको छैन । किसानहरु वर्षाका साथै अविलम्ब नहरमा पानी छाडिने आशामा बसेका छन् ।

टङ्कीसिनवारी– ७, ८, ९ र विराटनगर –४ र ५ वडाका अमराही इकराही गाउँका चारैतिरका खेत बाँझै देखिन्छ । पानीको व्यवस्था हुनासाथ रोपाइँ कार्यलाई तीव्रता दिनका लागि कतिपय किसानले सुख्खा खेतलाई जोतेर राखेका छन् । ती क्षेत्रमा सुनसरी मोरङ सिँचाइ आयोजना, डुम्राहा शाखा नहरबाट सिँचाइ हुन्छ । आजसम्म सो शाखामा पानी छाडिएको छैन ।

आयोजनाका प्रमुख मधुकरराज राजभण्डारीले भत्किएका मूल नहरको मर्मत हालै सम्पन्न भएकाले क्षमताअनुरुप पानी छाड्न नसकिएको र सो शाखाको सरसफाइ आजै सम्पन्न हुने भएकाले सम्भवतः आजै पानी छाडिने जानकारी गराउनुभयो ।

टङ्कीसिनवारीका किसान नारायण न्यौपानेले बढीमा असारको तेस्रो सातासम्ममा मन्सुलीलगायत उन्नत जातका धान रोपाइँ सम्पन्न गर्नुपर्नेमा नहरमा पानी नहुँदा यस क्षेत्रका किसान अत्तालिन थालेका छन् ।

ट्रयाक्टर सञ्चालक दौलत साहले तीन महिनादेखि खोलाबाट गिट्टी, बालुवा झिक्ने कार्य बन्द भएको र यतिखेर खेतमा पानी नहुँदा खेतको जोत्न पनि नपाउँदा आपूm मारमा परेको बताउनुभयो । टङ्कीसिनवारी–८ का किसान धनपत मण्डलले ३० मनको बिघामा अढाइ बिघा ठेक्कामा लिएको र अहिलेसम्म रोपाइँ गर्न नसक्दा खेतीमा घाटा लाग्ने अवस्था रहेको दुखेसो राख्नुभयो ।

नहरमा पानी आउनासाथ एकै पटक सबै किसानले रोपाइँ गर्न खोज्दा मजदुरको व्यापक अभाव हुने अवस्था सिर्जना हुने स्थानीयवासी जोनालाल माझीले बताउनुभयो । स्थानीय किसान कविराज न्यौपानेले समयमा रोपाइँ हुन नसक्दा उत्पादन घट्ने भएकाले सरकार गम्भीर हुनुपर्नेमा जोड दिनुभयो ।

यसैबीच कृषि विकास कार्यालयका प्रमुख राजेन्द्र उप्रेतीले मोरङमा २५ प्रतिशतसम्म रोपाइँ सम्पन्न भएको जानकारी गराउनुभएको छ । पूर्वपश्चिम राजमार्ग र जिल्लाको उत्तरी क्षेत्रमा भने ६० प्रतिशतको हाराहारीमा रोपाइँ भइसकेको छ ।

सुनसरी मोरङ सिँचाइ आयोजनाका क्षेत्रमा रोपाइँ कार्यले तीव्रता लिएको तथा बुधनगर र भातिगछ गाविसमा बोरिङको सहयोगले किसानहरु रोपाइँमा व्यस्त रहेको बताउँदै उहाँले भन्नुभयो, ‘धानबाली रोपाइँयोग्य वर्षा अविलम्ब भएमा मोरङ जिल्लामा चाँडै रोपाइँ सम्पन्न हुनेछ ।