इनेप्लिज
२०७२ जेठ २० गते १३:५७ मा प्रकाशित
काठमाडौँ, २० जेठ । राष्ट्रपति डा रामवरण यादवले आफ्ना चिनियाँ समकक्षी सी जिनपिङलाई आज एक समवेदना सन्देश पठाउँदै चीनको हुवेइ प्रान्तमा भएको पानीजहाज दुर्घटनामा परी धेरैजनाको निधन भएकामा गहिरो दुःख व्यक्त गर्नुभएको छ ।
नेपाल सरकार, नेपाली जनता र आफ्नातर्फबाट राष्ट्रपति सीलाई पठाउनुभएको सन्देशमा राष्ट्रपतिले याङ्जी नदीमा गत सोमबार भएको उक्त दुर्घटनामा ज्यान गुमाएकाहरुको चिरशान्तिको कामना गर्नुभएको छ ।
“यो दुःखद् घटनाले हामीलाई स्तब्ध र दुःखित तुल्याएको छ, आफ्ना प्रियजन गुमाएका शोकाकुल परिवारप्रति हाम्रो समवेदना छ,” दुःख र कठिनको यो घडीमा चिनियाँ सरकार र त्यहाँका जनतामा ऐक्यबद्धता प्रकट गर्दै राष्ट्रपतिले सन्देशमा भन्नुभएको छ ।
प्रतिक्रिया