इनेप्लिज
२०७२ वैशाख २७ गते ९:०८ मा प्रकाशित
बेलौरी (कञ्चनपुर), २७ वैशाख । गतसाताको आँधीहुरीका कारण अवरुद्ध भएको विद्युत् सेवा अझै सञ्चालन भएको छैन । विद्युत् अभावले यहाँको जनजीवन कष्टकर बनेको छ ।
महेन्द्रनगर बजारका केही स्थानमा मात्रै विद्युत् सेवा सञ्चालन भए पनि जिल्लाका अधिकांश क्षेत्रमा भने विद्युत् आपूर्ति हुन सकेको छैन ।
आँधीहुरीले रुख ढल्दा ठाउँ–ठाउँमा बिजुलीका तार चुँडिएका छन् । समयमै मर्मत नहुँदा विद्युत् आपूर्तिमा कठिनाइ भएको छ ।
स्थानीय बासिन्दाका अनुसार जिल्लाको दोधारा–चाँदनी, भीमदत्त नगरपालिका बजारबाहेक अधिकांश वडा, सुडा, दैजी, रौतेलीविचुवा, बेल्डाँडी, बेलौरी, शङ्करपुर, पुनर्वास, कृष्णपुर, पिपलाडी, देखतभूली क्षेत्रका ग्रामीण भेगमा अझै पनि विद्युत् सेवा अवरुद्ध भएको हो ।
नेपाल विद्युत् प्राधिकरणका इञ्जिनियर गोपाल चन्दले पर्याप्त जनशक्तिको अभावमा मर्मतसम्भारका काम द्रुत गतिमा सम्पन्न गर्न नसकिएको स्वीकार गर्दै चाँडोभन्दा चाँडो सेवा प्रवाह गर्न प्राधिकरण अहोरात्र खटेको बताउनुभयो ।
प्रतिक्रिया