बाजुराको पाण्डुसेन घर भएकी १४ वर्षीया मेनुका बुढा एक वर्ष पहिले काठमाडौँ मै अध्ययनका लागि गएकी थिइन् । वैशाख १२ गते गएको विनाशकारी भूकम्पपछि उनी बाजुरा पुगिन् । अब काठमाडौँमा नजाने निर्णय गरेर आफू मार्तडीमा रहेको मालिका उच्च माविमा कक्षा ९ मा भर्ना भएकी हुन् ।

घरमा खाना खाएको समयमा आएको भूकम्पले उनी काठमाडौंबाट निकै त्रसित भएको र खाना छोडेर चौरमा भागेको उनले बताइन् । त्यस्तै बाह्रबिस– ५ का सुनिल सिंह पनि काठमाडौंमा फिर्ता नहुने भएपछि स्थानीय मालिका उच्च माविमा भर्ना हुने भएका छन् ।

लाखौँ खर्च गरेर काठमाडौँ पढाएर के गर्ने छोरो बाँचेकामा यसमा आफूले गर्व महसुस गरेका छौँ, अब जस्तो भए पनि बाजुरामा नै पढाउने बुबा वीरबहादुर सिहंले बताउनुभयो ।

काठमाडौँमा भूकम्प गएपछि काठमाडौँमा अध्ययन, जागिर र उतै बसोवास गर्दै आएका सुदूरपश्चिमवासी केही घर फर्किसकेका छन् भने केही फर्कने क्रम जारी छ । दहकोटका खड्क रोकाया भन्छन्, जब बसमा कर्णाली तरेपछि बल्ल बाच्ने आश जागेको बताउँछन् ।

चार रातसम्म खुला आकाशमुनि रात बिताए बल्ल बसको टिकट पाएपछि आफू सुदूरपश्चिम पुग्दा मात्र आत्मबल बढेको खड्कले बताए । चार दिनसम्म त काठमाडौं आफ्नो होससमेत नरहेको दुखेसो पोखे ।

अध्ययनका लागि काठमाडौं गएको अधिकांश सुदूरपश्चिमवासी यतै अध्ययन गर्ने निर्णय गरिरहेका छन् । अछामको मङ्लसेनका कमल भण्डारी भूकम्प आएको बेला घरबाट दौडेर आफू बाचेको बताउँछन् । आफू बस्ने घर पूरै भत्केको बताए ।

शनिबार धनगढी बसपार्क उनले भने अब जस्तोसुकै परिस्थिति भए पनि यस्तै बस्ने बताए । काठमाडौँ पालमा बस्दा आकाशमा हेलिकप्टर, जहाज र सड्कमा गाडी गुड्दासमेत आफूलाई भूकम्प आएको भान हुने र डर त्रासमा बसेको बताए । जब सुदूरपश्चिममा पुग्दा महाविपत्तिमा परेका हामी बल्ल सुरक्षित भएको बताए ।

काठमाडौंबाट घर फर्कन थालेपछि धनगढी अत्तरियाबाट पहाडी जिल्लामा जानका लागि यात्रुले बस पाउनसमेत गाह्रो भएको सुदूरपश्चिम बस व्यवसाय समिति धनगढीले बताएको छ । दैनिक हजारौंको सङ्ख्यामा घर गइरहेका छन् । उता काठमाडौंमा यातायातका साधन नपाउँदा धेरै सुदूरपश्चिमवासी घर फर्किन पाएका छैनन् ।

सुदूरपश्चिमबाट पठाएका बस केही पुगेका छैनन् भने पुगेका पनि यात्रु बढी भएकाले टिकट पाउन समस्या भएको काठमाडौंबाट टेलिफोनमा मनबहादुर नेपालीले बताए ।

सरकारले निःशुल्क भनेका बस यो क्षेत्रका लागि प्रचारमा सीमित रहेको सुदूरपश्चिमवासीले बताएका छन् । सरकारले निःशुल्क भनेका बेला आफूहरु भाडा तिरेर पनि घर फर्किन नपाएको कैलालीका सुमन चन्दले बताए । घर जान आतुर रहेको छु, आफू बसेको चारैतिरबाट दुर्गन्ध फैलिएको छ । यसले गर्दा अर्को माहामारीको चपेटामा पर्ने डर रहेको चन्दले बताए । घर पुग्दा केही सहज हुन्छ की भन्ने आशामा रहेको उनको भनाइ रहेको छ । काठमाडौँबाट दैनिक हजाराँैको सङ्ख्यामा सुदूरपश्चिमवासी घर फर्र्किरहेका छन् ।