प्रवेशिका परीक्षामै प्राविधिक शिक्षाका विद्यार्थी सहभागी गराउने उद्देश्यले कुस्मानगरपालिका–१७ मा रहेको उक्त विद्यालयमा महायज्ञ सुरु भएको हो ।

महायज्ञको पर्वत जिल्लाका सभासद्हरु अर्जुनप्रसाद जोशी, कल्पना चापागार्इं र विकास लम्सालले संयुक्त रुपमा उद्घाटन गर्नुभयो । उद्घाटन कार्यक्रममा उहाँहरुले विद्यालयको शैक्षिक र भौतिक विकासका लागि सहयोग गर्ने प्रतिबद्धता व्यक्त गर्नुभएको छ । सभासद्ले सोही कार्यक्रममा विद्यालयका लागि आर्थिक सहयोग गर्ने प्रतिबद्धता पनि जनाउनुभयो ।

सभासद् अर्जुनप्रसाद जोशीले ५० हजार नगद र दुई लाख ५० हजार भौतिक पूर्वाधारको बजेट र कल्पना चापागार्इंले रु एक लाख २१ हजार र विकास लम्सालले एक लाख एक हजार रुपैयाँ सहयोग गर्ने प्रतिबद्धता जनाउनु भयो ।

वैशाख १४ गतेसम्म सञ्चालन हुने महायज्ञमा रु ६० लाखभन्दा बढी सङ्कलन गर्ने लक्ष्य आयोजकले राखेका छन् । यसबाट प्राविधिक शिक्षा सुरु गर्नका लागि पूर्वाधारको विकास तथा आवश्यक रकमको जोहो गर्न सहज हुने महायज्ञ आयोजक समितिका संयोजक चुडामणि सुवेदीले बताउनुभयो ।

विद्यालय तहमा प्राविधिक शिक्षा नहुँदा उत्पादित जनशक्ति बेरोजगार बन्दै गएकाले शिक्षालाई प्राविधिक बनाउन विद्यालय तहमा नै प्राविधिक विषय पठाउने उद्देश्य राखिएको महायज्ञ आयोजक समितिले जानकारी दिएको छ । कक्षा ९ देखि नै प्राविधिक विषय पढाउने उद्देश्यले आर्थिक सहयोग सङ्कलन गर्न महायज्ञ आयोजना गर्न लागिएको विद्यालयका पूर्व प्राचार्य एवम् महायज्ञ आयोजक समितिका संयोजक सुवेदीले भन्नुभयो ।

विसं २०१८ मा स्थापना भएको विद्यालयमा २०३४ सालदेखि निमाबि र २०५२ सालदेखि माध्यमिक तहको पढाइ सञ्चालन हुँदै आएको छ भने २०६६ सालमा उच्चमाध्यामिक तहको पढाइ भइरहेको छ । विद्यालयको भौतिक अवस्था कमजोर र जमिन साँघुरो भएकाले महायज्ञबाट उठेको रकमलाई विद्यालयको भौतिक सुधारमा लगाउने योजनासमेत बनाइएको छ ।