पाँच वर्षअघि इलाम नगरपालिका–३ ४ र ५ मा प्रतिआना एक लाख रुपैयाँमा किनबेच हुँदै आएको जग्गाको मूल्य अहिले दोब्बरभन्दा बढी भएको छ । हाल उक्त क्षेत्रमा प्रतिआना चार/पाँच लाख रुपैयाँ सम्ममा किनबेच भइरहेको छ ।

बसपार्क निर्माणसँगै होटल व्यवसाय गर्नका लागि इलामका ठूलाठूला होटल, व्यवसायीले ती क्षेत्रको जग्गा खरिद गरिरसकेका छन् भने कतिपयले धमाधम खरिद गरिरहेका छन् । पर्यटन प्रवद्र्धन गराउनका लागि पनि बसपार्क क्षेत्रमा ठूलाठूला घरहरु निर्माण हुदै छन् ।

सघन सहरी विकास कार्यक्रमअन्तर्गत सहरी विकास तथा भवन निर्माण विभाग डिभिजन कार्यालय इलामको लगानीमा निर्माण हुँदै आएको नयाँ बसपार्कको काम भइरहेको छ । अघिल्लो चरणमा जग्गाको सिमाङ्कन, रेखाङ्कनजस्ता कार्य सम्पन्न भई अहिले स्थानीय उपभोत्तामार्फत अन्डर ग्राउन्ड नाली निर्माण गर्ने, पर्खाल बनाउने कार्यसमेत भइरहेको बसपार्क उपभोक्ता समिति इलामका कोषाध्यक्ष ज्ञानु दाहालले जानकारी दिनुभयो ।

आर्थिक वर्ष २०६८/०६९ देखि इलाम नगरपालिका–३ स्थित सेरामा निर्माणाधीन नयाँ बसपार्क १४ रोपनी क्षेत्रफलमा निर्माण भइरहेको छ । इलाम बजारबाट तीन किलोमिटरको दूरीमा रहेको बसपार्क मेची राजमार्गसंग जोडिएको छ ।

उक्त बसपार्कको अनुमानित लागत करिब रु १० करोडको भए पनि यो वर्ष रु १९ लाख बजेट विनियोजन भएको छ । बसपार्क निर्माणका लागि पहिलो चरणमा ठेकेदारका काम सन्तोषजनक नभएपछि स्थानीय उपभोक्तामार्फत काम गरिएको बताइएको छ ।