इनेप्लिज
२०७१ चैत २९ गते ११:२८ मा प्रकाशित
सोलुखुम्बु, २९ चैत । आरोहणको मौसम सुरुवातसँगै सगरमाथा आधार शिविरमा चहलपहल बढेको छ ।
आधार शिविरमा ३० आरोहण दलका टोली पुगिसकेका छन् । सगरमाथा आरोहणका लागि आधार शिविरमा अधिकांश टोलीले क्याम्प खडा गरिसकेको आरोहण दलका सदस्य आङफूला शेर्पाले जानकारी दिनुभयो ।
प्रदूषण नियन्त्रण समितिका आइसफल डाक्टरहरुले बाटो खुल्ला गरेसँगै शिविरमा चहलपहल बढेको शेर्पाले जानकारी दिनुभयो ।
“आरोहण दलका सदस्य आधार शिविर पुग्ने क्रम जारी छ” उहाँले भन्नुभयो ।
आरोहण दललाई सघाउन र आवश्यक व्यवस्थापन गर्न आधार शिविरमा ८०० भन्दा बढी नेपाली पुगिसकेका छन् । गत वर्ष आधार शिविरमा गएको हिमपहिरोले १६ जना आरोहण दलका सदस्यको ज्यान गएपछि आरोहणका सबै टोली फिर्ता भएका थिए ।
गत वर्ष आरोहण स्थगित भएकाले पनि यस वर्ष चाप बढेको शेर्पाले जानकारी दिनुभयो ।
यसैबीच सगरमाथा आधार शिविरमा बाटो बनाउने क्रममा एक जना आइफल डाक्टर लडेर घाइते हुनुभएको छ । दोस्रो शिविरमा बाटो बनाउने क्रममा आज आङ्सार्की शेर्पा घाइते हुनुभएको हो । उहाँको खुट्टा भाँचिएको छ । उहाँलाई उपचारका लागि हेलिकप्टरमार्फत लुक्ला हुँदै काठमाडौँ लगिएको छ ।
प्रतिक्रिया