चरेस कारोबारको ‘केन्द्र’ बनेका यहाँका ग्रामीण क्षेत्रमा प्रहरीले निगरानी, चेकजाँच र कारबाही सुरु गरेको छ । कच्चापदार्थ तथा उद्योग नष्ट गर्ने, उत्पादन, बेचबिखन र ओसारपसारमा संलग्नविरुद्ध कारबाहीलाई प्रहरीले तीव्र पारेको छ ।

चरेस नियन्त्रणका लागि जनचेतना अभिवृद्धि गर्ने कार्यक्रम पनि सँगै लगिएको जिल्ला प्रहरी कार्यालयले जनाएको छ । प्रहरी सक्रियताकै कारण पछिल्लो समय चरेससहित पक्राउ पर्ने घटना पनि बढेका छन् । विशेषगरी पश्चिम क्षेत्रका गाविसमा चरेससम्बन्धी धेरै घटनाबाहिर आउने गरेका छन् ।

निशी, बोहोरागाउँलगायत दुर्गम गाविसबाट चरेससहित पक्राउ पर्नेको सङ्ख्या बढी रहेको प्रहरीनायब उपरीक्षक प्रेमबहादुर बस्नेतले बताउनुभयो । पछिल्लो एक महिनाभित्रमा निशीकै तीन महिला र एक पुरुष चरेससहित पक्राउ परेका छन् । तीमध्ये निशी–९ घर भएकी ४३ वर्षीया रीता घर्र्तिमगर र सोही स्थानकी २२ वर्षीया पूजा घर्तिमगरलाई नौ किलो चरेससहित यसैसाता प्रहरीले बोहोरागाउँबाट पक्राउ गरेको थियो ।

प्रनाउ बस्नेतका अनुसार चरेसमा ठूलो सञ्जाल प्रयोग हुने भएकाले प्रमुख व्यक्ति समात्नै गाह्रो हुने गरेको छ । बागलुङबाट बुटवल, काठमाडौँ, पोखरा, चितवनलगायत ठूला सहरमा चरेसको कारोबार हुने गरेको प्रहरीले जनाएको छ ।