गत पुस १ गतेदेखि शाखा अधिकृत लेखराज केसीले स्वेच्छिक अवकाश लिएपछि कार्यालय प्रमुख नहुँदा नागरिकता, राहदानी, जनजाति, मधेसी, दलितको प्रमाणित काम हुन सकेको छैन ।

सामान्य सिफारिसका लागि पनि जिल्ला प्रशासन कार्यालय जान सेवाग्राही बाध्य भएको नागरिक समाज देउखुरीका संयोजक निमबहादुर थापाले बताउनुभयो । जिल्ला प्रशासन कार्यालयले इलाका प्रशासन कार्यालय लमहीमा जम्मा भएका राहदानीको सिफारिस र नागरिकता प्रमाणपत्रमा साप्ताहिक रुपमा गर्न एक अधिकृतलाई पठाउने गरे पनि अहीले सो कार्यले निरन्तरता पाउन सकेको छैन ।

प्रजिअ लोकनाथ पौडेलले इलाका प्रशासन कार्यालयले प्रदान गर्ने काम नरोकिएको जिकिर गर्नुभयो । नयाँ अधिकृत नआउँदा इलाका प्रशासन प्रमुखविहीन भएको बताउँदै गृह मन्त्रालयबाट नयाँ अधिकृत तोकिएमा लमहीलाई पहिलो प्राथमिकता दिइने बताउनुभयो ।