सेवाग्राहीको मुख्य चाप रहने जिल्लाको मालपोत र नापी कार्यालय मै सेवाग्राही नआएपछि बिहानको सेवा प्रभावहीन भएको हो ।

बिहान ६ देखि १० बजेसम्म एउटै सेवाग्राही नआउने गरेको मालपोत कार्यालयका कर्मचारीको भनाइ छ । कार्यालयका प्रमुख मुक्तिप्रसाद आचार्यले पुसदेखि सुरु गरेको बिहानी सेवामा अहिलेसम्म कोही पनि सेवा लिन नआएको बताउनुभयो ।

बिहान १० बजेदेखि ५ बजेसम्म मात्र कार्यालय हुदाँ पनि मध्याह्न १२ बजेपछि मात्रै सेवाग्राहीको चाप बढ्ने गरेको बताउँदै उहाँले आर्थिक कारोबार दिउँसो गर्ने र मालपोतमा रहेको बैंकको कारोबार १० बजेपछि मात्रै सञ्चालन हुने भएकाले पनि सेवाग्राहीले बिहानको सेवामा नआउने गरेको भन्नुभयो ।

मालपोत कार्यालयका अधिकृत गोविन्द आचार्यले दिउँसोको मात्रै सिफ्ट हुँदा पनि सेवाग्राहीको चाप बढ्दा ६ बजेसम्म नै सेवा दिने गरेको बताउँदै १२ घण्टे सेवा जुन उद्देश्यले लागु गरेको हो त्यो पूरा नभएको बताउनुभयो ।

मालपोत कार्यालय प्रशासन शाखाका नासु नारायणप्रसाद भट्टराईले बिहानी सेवा सञ्चालनले कर्मचारी अभाव भएपछि आलोपालो गरेर कर्मचारीको व्यवस्थापन गरिएको उल्लेख गर्नुभयो ।

यता नापी कार्यालयमा पनि बिहानी सेवा प्रभावकारी नभएको कार्यालयका कर्मचारीले बताएका छन् । मालपोत कार्यालयमा काम भएपछि मात्रै नापीमा काम हुने भएकाले पनि यहाँको सेवा प्रभावकारी नभएको हो । बिहानी सेवामा कर्मचारी आएपनि सेवाग्राही नआउँदा यसको कुनै अर्थ नभएको कार्यालयको भनाइ छ ।