लोमान्थाङमा चिसोले च्याङग्रा र चौँरी मर्न थाले

इनेप्लिज २०७१ फागुन २५ गते ३:४७ मा प्रकाशित

chaunri melaमुस्ताङ, २५ फागुन । बाक्लो हिउँ जमेका कारण बढेको अत्यधिक चिसोले लोमान्थाङमा धमाधम च्याङग्रा र चौंरी मर्न थालेका छन् ।

चरन क्षेत्र पूरै हिउँले ढाकिएका कारण एक हप्तादेखि किसानले आफ्ना पशु चौपायालाई बाहिर निकालेका छैनन् । घाँस अभाव र चिसोका कारण एक हप्तामा लोमान्थाङमा २० भन्दा बढी च्याङग्रा र चौँरी मरेको अन्नपूर्ण संरक्षण क्षेत्र आयोजना लोमान्थाङका प्रमुख सन्तोष शेरचनले जानकारी दिनुभयो ।

“एकै गोठमा धेरै मरेका छैनन्, तीन/चारवटाका दरले मरेका छन्, किसानले आफ्नो पशु चौपायालाई पुरानो घाँस खुवाएर पालेका छन्”–उहाँले भन्नुभयो–“मौसममा सुधार आए पनि हिउँ पग्लन समय लाग्दा यस्तो समस्या आएको हो ।”

लोमान्थाङका अधिकांश घरमा च्याङ्ग्रा र चौँरीपालन गरिएको छ । चिसाले चौँरीभन्दा च्याङ्ग्राहरु बढी मरेको अनुमान गरिएको छ । चरनका लागि गएका थुप्रै च्याङ्ग्रा चरण क्षेत्रमै मरेको अनुमान गरिएको प्रमुख शेरचनले बताउनुभयो ।

पशु चौपाया धमाधम मर्न थालेपछि किसान निकै समस्यामा परेको बताइएको छ । दसैं–तिहारलाई लक्ष्यित गरी पालिएका च्याङ्ग्राहरु मरेपछि नेपाली बजारको माग थेग्न तिब्बती किसानले पालेका भेडाच्याङ्ग्रामै बढी निर्भर हुनुपर्ने बाध्यता सिर्जना भएको छ ।

प्रतिक्रिया