इनेप्लिज
२०७१ फागुन २२ गते ११:४५ मा प्रकाशित
भक्तपुर, २२ फागुन । सरकारले हात्तीपाइलेविरुद्धको औषधि खुवाउन सुरु गरेको छ वर्ष बिते पनि प्रभावकारी नहुँदा भक्तपुर हात्तीपाइले रोगको उच्च जोखिममा रहेको पाइएको छ ।
जिल्ला जनस्वास्थ्य कार्यालय भक्तपुरले आज यहाँ आयोजना गरेको पत्रकार सम्मेलनमा वरिष्ठ जनस्वास्थ्य अधिकृत दिनेशकुमार चापागार्इंले भक्तपुर नगरक्षेत्र हात्तीपाइले रोगको उच्च जोखिममा रहेको जानकारी दिनुभयो । भक्तपुर नगरपालिकाका बासिन्दाले २० प्रतिशतले मात्र यसको औषधि खाएको र अरुले औषधि खान नमानेपछि यो क्षेत्र उच्च जोखिममा रहेको बताइएको छ ।
कार्यालयले यस वर्षमा भक्तपुरमा दुई लाख ९१ हजार २०८ जनालाई हात्तीपाइलेको औषधि खुवाउने लक्ष्य राखेको छ । भक्तपुरमा औषधि खुवाउने अभियान यही फागुन ३० गते सुरु भई चैत २ गतेसम्म घरघरमा गएर खुवाउने कार्यक्रम छ । यसका लागि कार्यालयले १८२ स्वास्थ्यकर्मी र एक हजार ७१७ स्वयम्सेवक परिचालन गर्ने भएको जनस्वास्थ्य अधिकृत प्रेमबहादुर थापाले जानकारी दिनुभयो ।
औषधि खुवाउँदा कुनै समस्या आएमा भक्तपुर अस्पतालमा निःशुल्क औषधि उपचार गर्ने व्यवस्था गरिएको जनाइएको छ । डा विशाल श्रेष्ठले हात्तीपाइलेको औषधि खान डर मान्नु नपर्ने बताउँदै निर्धक्क भएर औषधि खान आग्रह गर्नुभयो । उहाका अनुसार भक्तपुरमा अहिलेसम्म ५० प्रतिशत नागरिकले औषधि खाएका छन् । भक्तपुरमा २१५ जनामा हात्तीपाइलेका बिरामी भेटिएको बताइएको छ ।
प्रतिक्रिया